Qyzylordalyq túlekter «Serpin-2050» jobasynyń grant ıegeri atandy

QYZYLORDA. 24 tamyz. Qyzylorda oblysy Jańaqorǵan aýdanynda «Serpin-2050» jobasynyń grant ıegerlerin shyǵaryp salý qurmetine saltanatty jıyn ótti. Bul týraly egemen.kz tilshisi habarlady. Jıynǵa aýdan ákimi Rýslan Rústemuly men «Serpin-2050» áleýmettik jobasy Respýblıkalyq úılestirý keńesiniń tóraǵasy Murat Ábenov qatysty. Atalmysh jobaǵa degen aýdan jastarynyń qyzyǵýshylyǵy rasynda da joǵary boldy. Mysaly, ótken jyly 75 jas serpinshi atansa, bıylǵy talapker sany eselene túsken. Aýdan boıynsha 78 oqýshy kolledjderge, 194 oqýshy joǵary oqý oryndaryna ózderiniń qujattaryn tapsyrǵan. Sonyń nátıjesinde 122 jas joǵarǵy oqý oryndaryna, 66 jas kolledj granttarynyń ıegeri atandy. Aýdan ákimi R.Rústemov «Serpin-2050» baǵdarlamasynyń tıimdiligi jastardyń bilim alýyna jol ashyp qana qoımaı, memleket qoldaýymen áleýmettik jaǵynan kótermeleýge de zor múmkindik beretindigin aıtyp, jańaqorǵandyq jas túlekterdi bolashaqta sapaly bilim alyp, bilikti maman bolyp, el ıgiligi jolynda aıanbaı eńbek etýge shaqyrdy. Munan keıin sóz alǵan «Serpin-2050» grant ıegerleri ózderi túlep ushqan altyn uıa mektepterine alǵys bildirip, senimdi aqtaıtyndaryna sendirdi Saltanatty kesh sońy aýdan jastarynyń arnaıy konserttik baǵdarlamasymen jalǵasty. Erjan Baıtiles. Derek, sýret: egemen.kz.