Shymkentte 8 otbasyǵa páter kilti tapsyryldy

ShYMKENT. 5 naýryz. Shymkentte tabıǵı gazdyń jarylysy saldarynan baspanasyz qalǵan segiz otbasyǵa páter kilti tapsyryldy. Bul týraly egemen.kz tilshisi habarlady. Bar-joǵy eki aıdyń ishinde zardap shegýshilerdiń tilegi oryndalyp, qýanyshqa keneldi. Saltanatty shara qala ákimdiginde ótti. Bul segiz otbasy qaqaǵan qystyń ortasynda baspanasyz qalǵan bolatyn. Sodan beri jataqhanany panalap, kúneltti. Bılik bergen ýádesinde turyp, eki aıdyń ishinde qaıtadan úıli etti. Beısenbek Janbosynov, qala ákiminiń orynbasary: «Bıýdjetten 69 mıllıon teńge bólindi. Ol qarjy – qala ákimdiginiń tótenshe jaǵdaıdyń saldarynan joıýǵa baǵyttalǵan qarajat. Bul aqshaǵa úsh bólmeli eki páter, eki bólmeli alty páter satyp alyndy». Eske salaıyq, 20-jeltoqsan kúni Aqnazarhan kóshesindegi № 62 úıde gaz jarylyp, oqys oqıǵa oryn alǵan bolatyn. Sonyń saldarynan 8 páterli úı qırap qaldy. Sóıtip, turǵyndar qaýipsiz jerge kóshirildi. Kúshti jarylystan úıdiń negizgi qabyrǵalary qıraǵandyqtan, ony qalpyna keltirý ońaı bolmaǵan. Ony apatty dep tapqan mamandar baspananyń qaldyǵyn súrip te tastady. Bul oqys oqıǵa 67 jastaǵy Roza Karchagınany eseńgiretip tastady. Biraq ákimdik mamandarynyń baspanasyz qalmaısyz degen ýádesi qaıta jigerlendiripti. Búgin jańa páteriniń kiltin alǵanda kózine jas ta uıalady. Qýanyshy qoınyna syımaı, páterdi arnaıy kelip kórdi. Baqtııar Taıjan. Derek: egemen.kz. Sýret: Ońtústik Qazaqstan oblystyq ákimdiginiń baspasóz qyzmeti.