Keshe Premer-Mınıstrdiń orynbasary Berdibek Saparbaev Ońtústik Qazaqstan oblysyna jumys saparymen keldi.
Vıse-premer bıylǵy aqpan aıynda ashylǵan Shymkent qalalyq №1 balalar aýrýhanasynyń jumysymen tanysty. Úkimet basshysynyń orynbasary aýrýhananyń májilis zalynda oblystaǵy bilim berý, densaýlyq saqtaý, mádenıet jáne sport salasynyń qyzmetkerlerimen kezdesti. Bul májiliske Premer-Mınıstrdiń orynbasarymen birge Mádenıet jáne sport mınıstri Arystanbek Muhamedıuly, Bilim jáne ǵylym mınıstri Aslan Sárinjipov qatysty.
Júzdesýdi oblys ákimi Asqar Myrzahmetov júrgizip otyrdy. Keńeste Ońtústik Qazaqstan oblystyq densaýlyq saqtaý basqarmasynyń basshysy S.Pákeev, bilim basqarmasynyń basshysy A.Elshıeva jáne mádenıet basqarmasynyń basshysy K.Aıdarbekova shaǵyn baıandama jasap, óz salalary boıynsha óńirdegi atqarylyp jatqan jumystardy júıe-júıesimen taldap aıtyp berdi.
Al onyń sózin oblys ákimi Asqar Myrzahmetov tolyqtyryp, aýdan, qala baǵyttarynda da «Jedel járdem» júıesi jolǵa qoıylǵanyn jetkizdi.
Bilim jáne ǵylym mınıstri Aslan Sárinjipov oblystyq bilim basqarmasynyń basshysy A.Elshıevadan oqýshylardy oqýlyqpen qamtýdyń qalaı sheshilip jatqandyǵyn surasa, Mádenıet jáne sport mınıstri Arystanbek Muhamedıuly oblystyq mádenıet basqarmasynyń basshysy K.Aıdarbekovaǵa tyndyrymdy jumysy úshin alǵysyn aıtty.
Keńesti Premer-Mınıstrdiń orynbasary Berdibek Saparbaev qorytty.
– Álemdi qansha ret daǵdarys qyspaǵyna alyp, myqty memleketterdiń kóbi taryǵyp jatqan kezeńniń ózinde Elbasy densaýlyq saqtaý, bilim, mádenıet jáne sport salasyna bólinetin qarjyny eselep keledi, – dedi Berdibek Máshbekuly. – О́ıtkeni, Qazaqstanǵa deni saý, bilimdi, mádenıetti urpaq kerek. Máselen, Ońtústikte densaýlyq saqtaý salasyna 90,3 mlrd. teńge bólinip, ótken jyldardan 8,3 paıyzǵa artqandyǵy memlekettiń «Salamatty Qazaqstan» baǵdarlamasyn túbegeıli oryndaýǵa baǵyt ustaǵandyǵyn ańǵartady.
Qazaqstanda qarjy joq emes, bar. Biraq ony maqsatsyz, ońdy-soldy jumsaýǵa jol berilmeıdi. Premer-Mınıstrdiń orynbasary osy jaıǵa aıryqsha toqtaldy. Shetelde ambýlatorııalyq kómek jolǵa qoıylǵan, aýrýhanalarǵa aýyr naýqastar ǵana jatqyzylady. Bizde de osyndaı jaqsy tájirıbelerden úırený kerek. Respýblıkada medısına salasy qyzmetkerlerin daıarlaýda oralymsyzdyqtar bar. Kadr sapasyna qatty kóńil aýdarmasa bolmaıdy. Eń aldymen meıirbıkelerdiń biliktiligin arttyrýdy jolǵa qoıý kerek. О́ıtkeni, tamyr ustap, ýkol sala almaıtyn aýrýhana qyzmetkerlerine jurtshylyq tarapynan oryndy syn aıtylyp jatyr. Úkimet densaýlyq saqtaý salasyna orasan qarjy bólip, eń sońǵy úlgidegi medısınalyq qondyrǵylardy áperip jatyr. Alaıda, sol qymbat qondyrǵylardyń iske qosylmaı turǵandary da kóp. Nelikten? Kadr daıyn emes. Sondyqtan, biliktilikti arttyrý úshin bilim kóterý, qajet jaǵdaıda shetelderde oqytýdy, tájirıbe almasýdy odan ári iske asyratyn bolamyz. Keleshekte medısınalyq tehnıkalar lızıng júıesimen alynatyn bolady. Bul jaýapkershilikti arttyrý úshin kerek.
Ońtústik Qazaqstan oblysynyń áleýmettik-ekonomıkalyq ahýaly jaqsy. О́ńirdiń aýdan, qala ortalyqtarynda zaman talabyna saı ǵımarattar salynyp, el ıgiligine berilýde. Shymkent shyn máninde Qazaqstandaǵy sáýletti qalalardyń birine aınaldy. Osyndaı tyndyrymdy jumystary úshin oblys basshysy Asqar Isabekulyna ózimniń rızashylyǵymdy bildiremin.
Memlekettiń bilim salasyna bóletin qarjysy tómendemeıdi. Áıtse de oılasatyn jaıttar barshylyq. Ońtústikte halyq kóp. Jyl saıyn 80 myńnyń ústinde sábı dúnıege keledi. Bul – jaqsylyq. Biraq olardy memlekettik baǵdarlamamen ǵana balabaqshaǵa ornalastyrý qıyn. Sondyqtan, balabaqsha salý isine kásipkerlerdi tartýdy jalǵastyra berý kerek. 2020 jylǵa deıin apatty jáne apat jaǵdaıyndaǵy mektepterdi joıyp, jańa bilim oshaqtaryn salatyn bolamyz. Memleket osy maqsatqa jyl saıyn Ulttyq qordan 3 mıllıard dollarǵa deıin aqsha bólmek. Oqýshylardy sapaly oqýlyqtarmen qamtamasyz etý kún tártibinde tur. Tamyz aıyna deıin bul másele durys sheshilýi kerek.
Premer-Mınıstrdiń orynba-
sary sapaly kadr máselesine, kásiptik-tehnıkalyq ýchılıshelerdegi maman daıyndaý jaǵdaıyna toqtaldy. Ekonomıst, zańger, muǵalim sııaqty mamandyq ıeleri kóp. Deni jumys tappaı otyr. Al zaýyt, fabrıkalarǵa ındýstrııalyq-ınnovasııalyq baǵdarlama boıynsha jańasha jumys jasaı alatyn mamandar asa qajet. Sondyqtan, oılasyp jasaıtyn sharýalar jetkilikti. Birin biri aına-qatesiz qaıtalaıtyn, suranyspen jumys jasamaıtyn joǵary jáne orta oqý oryndaryn jabýǵa, búgingi kún talabyna saı mamandar daıarlaýǵa kirisetin bolamyz, dedi ol.
Premer-Mınıstrdiń orynbasary oıyn osylaı qorytty.
Budan keıin Berdibek Máshbekuly «Qazyna» etno-tarıhı kesheninde bolyp, osyndaǵy atqarylǵan jumystarmen tanysty. Kelesi kezekte ol «Karlskrona LC AB» JShS-inde boldy. Atalǵan kásiporyn alǵashqy ret óńirimizde dıskili aınalmaly bekitpeler men «Zulzer» konsoldi sorǵylar óńdirip otyr. Jylyna 6500 dana ónimdi otandyq naryqqa shyǵaratyn zaýyt zatynyń quny 2 mlrd. teńgeni quraıdy. Búginde munda 20 adam jumyspen qamtylǵan.
Osy zaýyttyń óndiristik sehynda Berdibek Saparbaev eńbek qatynastary máseleleri jóninde jıyn ótkizdi. Oǵan óńirdegi memlekettik mekemelerdiń basshylary men iri jáne orta kásiporyndardyń jetekshileri, úkimettik emes uıymdardyń tóraǵalary qatysty.
Sol kúni B.Saparbaev pen A.Sárinjipov Qazyǵurt aýdanynyń Atbulaq eldi mekeninde Jambyl Qapparov atyndaǵy №5 mamandandyrylǵan fızıka-matematıka mektep-ınternatynyń ashylý saltanatyna qatysty.
Vıse-premerdiń jumys sapary búgin Túrkistan qalasynda jalǵasady.
Baqtııar TAIJAN,
«Egemen Qazaqstan».
Ońtústik Qazaqstan oblysy.
Sýretti túsirgen
Qaısar Sherim.
