Túrkistanda bokstan dástúrli Sattarhanov týrnıri bastaldy

ShYMKENT. 1 sáýir. Búgin Ońtústik Qazaqstan oblysy Túrkistan qalasynda 2000 jyly Sıdneıde ótken XXVII jazǵy Olımpıada oıyndarynyń jeńimpazy Bekzat Sattarhanovty eske alýǵa arnalǵan jastar arasyndaǵy XIV halyqaralyq týrnır bastaldy. Bul týraly oblystyq ákimdiktiń baspasóz qyzmetiniń deregine súıengen egemen.kz tilshisi habarlady. «Atalǵan týrnırge Qytaı, Reseı, Mońǵolııa, Qyrǵyzstan, Tájikstan, Ázerbaıjan, О́zbekstan elderi men Qazaqstannyń barlyq oblystarynan 200-ge jýyq jas sportshylar qatysýda. Sonymen birge, 13 salmaq dárejesi boıynsha ótetin bul saıystyń ereksheligi 3 salmaq dárejesi boıynsha qyzdarymyz da baq synaıtyn bolady», - delingen habarlamada. Jyl saıyn dástúrge aınalǵan halyqaralyq týrnır bıyl erekshe sán saltanatymen bastaý aldy. Er Bekzattyń ómirindegi aıtýly kúnderdiń qurmetine oraı, uıymdastyrylǵan jarystyń ashylý saltanaty Q.A.Iаssaýı atyndaǵy halyqaralyq qazaq-túrik ýnıversıtetiniń mádenıet saraıynda ótti. Jastar arasyndaǵy halyqaralyq saıysty resmı túrde oblys ákiminiń orynbasary Sáken Qanybekov ashyp, barlyq sportshylarǵa sáttilik tiledi. Budan soń Túrkistan qalasynyń ákimi Álipbek О́serbaev, Olımpıada jeńimpazdary Serik Sápıev, Baqyt Sársekbaev jurt aldynda ıgi tilekterin bildirip, B.Sattarhanovtyń ata-anasyna syı-sııapat jasap, qurmet kórsetti. Jarystyń ashylý saltanatynda tuńǵysh Olımpıada jeńimpazy Bekzat Sattarhanovqa arnalǵan fılm kórsetilip, belgili aıtysker aqyn Bearys Shoıbekov bastaǵan bir top óner juldyzdary men jergilikti ónerpazdardyń konsertine ulasty. Týrnır Bekzat Sattarhanovtyń týǵan kúni - 4 sáýir kúni óziniń máresine jetedi. Baqtııar Taıjan. Mánbe, sýret: Ońtústik Qazaqstan oblystyq ákimdigi.