Aqsaqal men aıý

Árbir qalanyń óz nyshandyq belgisi – sımvoly bar. Ol negizinen qoldan jasalǵan músin túrinde bolady. Al Tájikstan astanasy – Dýshanbeniń nyshany retinde kóp jyldardan beri jandy nárseler – Talabsho esimdi qart pen Marııa atty urǵashy aıý kórinip keledi. Osy bir tań qalarlyq erekshe jup kóp jyldardan beri quddy saǵattyń tili sııaqty týra taltúste jetektesip kóshege shyǵyp, biraz júrip qaıtady. Sonymen birge, olarmen betpe-bet jolyqqan jurt arasynda eshkim de jyrtqysh ańnan qorqa qoımaıdy. Talabsho Sheıhov budan 17 jyl buryn Marııany Pamır taýlarynyń baýraıynan taýyp alypty. Ańshy kezikken kezde aıýdyń qonjyǵy áldekim óltirip ketken anasynyń janynda jatyr eken. Zeınetker sosyn taý ishinde japadan-jalǵyz qalǵan tirshilik ıesin aıap, ózimen birge ala ketedi. Úıine ákelgesin ony baladaı mápelep baǵady. «Men ony jaqsylap tamaqtandyryp turdym. Oǵan tipti aqyldy da meıirimdi bolyp ósýi úshin ana sútin saýyp bergizdim. Al Marııa shynynda aqyldy bolyp ósti. Ári meıirimdi. Adamdardy jaqsy kóredi. Ol maǵan týra qyzym nemese nemerem sııaqty bolyp shyqty», – deıdi qazir qarııa. «Bizdiń janymyzdan myń­­daǵan adam ótip jatady. Biraq birde-biri amandaspaıdy. Sosyn men Marııaǵa: «Qarashy, jurt adammen amandasýdy da qoıypty. Olardy da adam deıdi-aý. Kel, odan da ekeýmiz qatar turyp alyp, olarǵa sálem berýdi úıreteıik», deımin. Marııa muny túsinip, meniń janyma tura qalady da, ótip bara jatqandarǵa ıilip, sálem jasaıdy. Sol kezde men kópshilikke: «Meniń aıýymnan qalaı aqyldy bolýdy úırenińder deımin», – dep aǵynan aqtarylady qarııa. Dýshanbede aqsaqal men onyń aıýyn bilmeıtin adamdar kemde-kem. Marııa jurtpen birge sýretke túskendi, sosyn shalǵynda aýnap jatqandy erekshe jaqsy kóredi. Aıtqandaı, ol shóptiń qasıetin de jaqsy biledi eken. Qart sonyń arqasynda fıtoterapııany da úırenip alyp, emdik qasıetteri bar tundyr­malar jasaıtyn bolypty. Talabsho ataı bıylǵy jyly 80-ge tolady eken. Osydan on jyl buryn ol ekinshi ret úılenipti. Aqsaqaldyń kenje uly bıyl mektepke barady. Qaırat QULYMBET.