ASTANA. 26 tamyz. Qazaqstan Prezıdenti men Pákstan premer-mınıstri kelissózderdiń qorytyndysy boıynsha birlesken baspasóz brıfıngin ótkizdi. Bul týraly akorda.kz habarlady.
Brıfıngte Qazaqstan Prezıdenti kelissózder barysynda ekijaqty yntymaqtastyqtyń keń aýqymdaǵy máseleleri qozǵalǵanyn jáne óńirdiń ahýaly, sonyń ishinde Aýǵanstan men Taıaý Shyǵystaǵy jaǵdaıdyń talqylanǵanyn atap ótti.
Memleket basshysy kólik-tranzıt salasyndaǵy yqpaldastyqty damytýǵa aıryqsha kóńil bólingenin, eki eldiń taýar aınalymy deńgeıin arttyrýdyń osyǵan baılanysty ekenin aıtty. «Qazaqstannyń «Nurly jol» baǵdarlamasy men Qytaıdyń «Jibek jolynyń ekonomıkalyq beldeýi» jáne Qaraqorym joly memleketter arasyndaǵy yntymaqtastyqty jandandyrýǵa septigin tıgizedi dep sanaımyn. Sonymen birge, Qazaqstan-Túrikmenstan-Iran temirjoly Pákstannyń teńiz porttaryna shyǵýǵa jol ashady. Osy kólik baılanystary bizge saýda jáne ekonomıkalyq qarym-qatynastardy jaqsartýǵa múmkindik beredi», – dedi Qazaqstan Prezıdenti.
Nursultan Nazarbaev ónerkásipke, farmasevtıkaǵa, energetıkaǵa, áskerı-tehnıkalyq salaǵa, ǵylymǵa jáne basqa da mańyzdy baǵyttarǵa qatysty Qazaqstan men Pákstannyń naqty qadamdary týraly ýaǵdalastyqqa qol jetkizilgenin aıtty.
Qazaqstan Prezıdenti aýyl sharýashylyǵy ónimderin óńdeý, hımııa jáne jeńil ónerkásip, bank sektory sııaqty salalarda yntymaqtastyqty jolǵa qoıý maqsatynda Iskerlik keńes qurylǵanyna da toqtalyp ótti. Sonymen qatar, Pákstan premer-mınıstri delegasııasynyń quramynda isker top ókilderi de keldi.
Memleket basshysy Pákstan N.Sharıftiń basshylyǵymen ekonomıkalyq ósim qarqynyn údetip, álemdik saıasattaǵy salmaqty orny bar elge aınalyp kele jatqanyn atap ótti.
Nursultan Nazarbaev Azııadaǵy ózara is-qımyl jáne senim sharalary keńesin ótkizý, «EKSPO-2017» kórmesin ótkizý quqyǵy úshin daýys berý, Qazaqstannyń DSU-ǵa kirýi máselelerine qatysty bizdiń elimizdi Pákstannyń qoldaǵanyna jáne búgingi tańda Qazaqstannyń BUU Qaýipsizdik keńesiniń turaqty emes músheligine kandıdatýrasyn da qoldap otyrǵanyna nazar aýdardy. Osyǵan oraı Memleket basshysy Pákstan tarapyna zor alǵys bildirdi.
Pákstan premeri jyly qabyldaý men qonaqjaılyq úshin alǵys aıtyp, jańa elorda – Astana qalasy Qazaqstannyń ilgerileýi men órkendeýiniń sımvoly bolyp sanalatynyn atap ótti. «Meni Nursultan Nazarbaevtyń kemel basshylyǵynyń arqasynda Qazaqstannyń qol jetkizgen áleýmettik-ekonomıkalyq progresiniń aýqymy tánti etti. Biz elderińizge aldaǵy ýaqytta da tabys pen baq-bereke tileımiz. Bizdiń memleketterimizde qarym-qatynas pen ózara yntymaqtastyqty jaqsartýǵa qajetti zor áleýet bar», – dedi N.Sharıf. Ol sapar barysynda taraptar ekijaqty qarym-qatynastar men halyqaralyq kún tártibindegi keń aýqymdy máselelerdi talqylaǵanyn da aıtty. «Biz bilim jáne ǵylym, ekonomıka, kólik, keme qurylysy, sondaı-aq áýe qatynasy salalaryndaǵy ózara yqpaldastyqty nyǵaıtýǵa kelistik. Qazaqstan munaıy men gazynyń ımportyna, jeńil ónerkásipte, aýyl sharýashylyǵynda, farmasevtıka jáne basqa salalarda birlesken kásiporyndar ashýǵa qatysty ýaǵdalastyqtarǵa qol jetkizildi», – dedi Pákstan Islam Respýblıkasynyń premer-mınıstri.
N.Sharıf ekijaqty qatynastardaǵy ınstıtýsıonaldyq tetikterdi nyǵaıtý ıntegrasııalyq úderisterge, búkil óńirdegi beıbitshilik pen turaqtylyqty saqtaýǵa oń yqpal etetinin atap ótti. «Qazaqstan men Pákstan ShYU jáne BUU sııaqty halyqaralyq uıymdar aıasynda budan ári de yntymaqtasýǵa yqylas tanytyp otyr», – dep atap ótti N.Sharıf.
- Pákstan premeri N.Sharıftiń Qazaqstanǵa resmı sapary aıasynda qol qoıylǵan ekijaqty qujattardyń tizimi:Qazaqstan Respýblıkasynyń Prezıdenti men Pákstan Islam Respýblıkasynyń premer-mınıstriniń birlesken málimdemesi.
- Qazaqstan Respýblıkasynyń Qorǵanys mınıstrligi men Pákstan Islam Respýblıkasynyń Qorǵanys mınıstrligi arasyndaǵy Qazaqstan Respýblıkasy Qarýly kúshteriniń áskerı qyzmetshilerin Pákstan Islam Respýblıkasy Qorǵanys mınıstrliginiń áskerı oqý oryndarynda oqytý týraly kelisim.
- Qazaqstan Respýblıkasynyń Syrtqy saýda palatasy men Pákstan Islam Respýblıkasynyń Saýda jáne ónerkásiptik palatalary federasııasy arasyndaǵy birlesken Iskerlik keńesti qurý týraly ózara túsinistik memorandým.
Aıdar О́risbaev.
Derek, sýret: akorda.kz.
