Keshe elordada «Aýyl» qazaqstandyq sosıal-demokratııalyq partııasynyń kezekten tys H sezi ótip, onda jańa basshy saılandy.
Quryltaı jumysyna partııanyń barlyq óńirlik fılıaldarynyń delegattary qatysty. Kún tártibine «Aýyl» partııasyn 2002 jyldan beri basqaryp kele jatqan Ǵanı Qalıev basqa jumysqa aýysýyna baılanysty partııa basshysy mindetin tapsyryp, jańa tóraǵa saılaý máselesi shyǵarylǵany belgili boldy. «Qazaqstan aldynda álemniń 30 damyǵan elderi qataryna enýi úshin jan-jaqty jańǵyrtýdy júzege asyrý mindetteri tur. Sondyqtan da «Aýyldyń» basshylyǵyna jańa bastamalarmen, ıdeıalarmen, sondaı-aq, ózgeshe kózqaraspen qarýlanǵan jańa jetekshiniń bolǵany abzal», dep atap ketti Ǵanı Álimuly. Partııa basshysyna laıyq osyndaı qasıetterdi aýyldyqtar Parlament Senatynyń depýtaty Álı Bektaevtyń boıynan tabylady dep sheshipti. Á.Bektaev birinshi bolyp «Aýyl» QSDP-nyń Ońtústik Qazaqstan oblysyndaǵy fılıalyn basqarǵan. Jańa jetekshiniń kelýimen óńirlerdegi partııa fılıaldarynyń jumysy jandana túsedi dep kútilýde. Partııanyń Pavlodar oblystyq fılıalynyń ókili Kenje Keńesbaev partııa basshylyǵyna kelgen Álı Bektaevtyń Ońtústik Qazaqstan oblystyq fılıalyndaǵy partııalyq basshylyq tájirıbesi partııa jumysyna jańa tynys beredi degendi erekshe atady. Sondaı-aq, partııa basshysynyń aýysýyna qatysty pikirin bildirgen saıasattanýshy Vladımır Telnov óz sózinde «Aýyl» partııasy ómirsheńdigin, sondaı-aq, jańa kezeńge beıimdigin dáleldedi degendi basa aıtty. Olaı bolsa, jańa tóraǵa saılanýymen «Aýyl» partııasy elimiz aldynda turǵan, sonyń ishinde, aýyl sharýashylyǵyn damytý máselelerinde memlekettik organdarǵa kómek kórsetý baǵytynda jańa mindetterge sáıkes óz jumysyn uıymdastyra alady.
Asqar TURAPBAIULY,
«Egemen Qazaqstan».
