Adam quqyǵyn qorǵaý – izgilikti is

Prezıdent janyndaǵy Ortalyq kommýnıkasııalar qyzmetinde Qazaqstan Respýblıkasyndaǵy Adam quqyqtary jónindegi ýákil (Ombýdsmen) Asqar Shákirov brıfıng ótkizdi. Onda Memleket basshysy Nursultan Nazarbaev usynǵan 5 ınstıtýttyq reforma negizinde adam quqyqtaryn qorǵaýdyń ulttyq júıesin jetildirý jáne azamattyq qoǵam damýynyń talaptary sóz boldy. Jıyn barysynda Asqar Shákirov 5 ınstıtýttyq refor­ma­nyń mańyzdylyǵyna jáne elimiz­degi adam quqyqtaryn qorǵaý máse­lelerine keńinen toqtala kelip: – Respýblıkamyzda adam quqyqtary kóbine jekelegen sheneýnikter tarapynan buzylady. Mundaı keleńsizdikter barlyq salalarda oryn alýda. Sondyqtan da, bes ınstıtýttyq reformadaǵy mańyzdy aspektilerdiń biri retinde memlekettik apparatty jetildirý qarastyrylyp otyr. Bul osy máselege qatysty memleket aldynda turǵan aýqymdy mindetterdi júzege asyrýǵa múmkindik beredi, – dedi. Spıkerdiń aıtýynsha, qazirgi tańda Ombýdsmen mekemesine azamattardan kelip túsetin shaǵymdardyń 14 paıyzynda rásimderdi buzý, salǵyrttyq pen áýre-sarsańǵa salý jáne laýazymdy tulǵalardyń áreketsizdigi týraly faktiler kórsetiledi eken. Sonymen qatar, azamattar kóbinese ózderiniń naqty zańnamalar men halyqaralyq qujattar aıasyndaǵy quqyqtary da jıi buzylatyndyǵyna baılanysty aryzdanatyny belgili boldy. Buǵan qosa, keıbir jeke laýa­zymdy tulǵalar turǵyndardyń máseleleri men saýaldaryna óz deńgeıinde jaýap berý qajettigin eskermeıtini de kóp kezdesetin kórinedi. Asqar Shákirov balalardyń quqyǵyn qorǵaý isine qatysty da óz pikirin bildirdi. – Balalardyń quqyn qorǵaý – eń mańyzdy jumystardyń biri. Bul baǵytta kóptegen sharalar qolǵa alynýda. Máselen, biz halyqaralyq sarapshylardy tarta otyryp, balalar men jasóspirimderge jábir kórsetý máselesi jóninde birqatar zertteýler júrgizdik. Sonyń nátıjesinde, birqatar jaıttardyń ózekti bolyp kele jatqanyna kóz jetkizdik, – dedi Ýákil. Joldybaı BAZAR, «Egemen Qazaqstan». Sýret: inform.kz