AQTО́BE. 21 mamyr. Aqtóbege Uly Jeńistiń 70 jyldyǵyna oraı Sankt-Peterbýrg qalasynyń Nevskıı aýdanynan bir top soǵys ardageri keldi. Olardy Aqtóbe qalasynyń ákimi Erhan Omarov qabyldady. Bul týraly egemen.kz tilshisi habarlady.
Delegasııanyń kelý maqsaty – Qazaqstandaǵy ardagerlermen kezdesý, qazaq halqynyń tarıhymen jáne mádenıetimen tanysý. Qonaqtarmen kezdesý barysynda shahar basshysy eki el arasyndaǵy yntymaqtastyqqa erekshe nazar aýdardy. Uly Jeńistiń 70 jyldyǵy óńirde keń kólemde atalyp ótkenin, mundaı izgilikti kezdesýlerdiń soǵys kezindegi aǵa urpaqtyń erlik isteri men janqııarlyq eńbegin jastardyń jadynda jańǵyrtyp, olardyń boıynda otansúıgishtik qasıetti qalyptastyrýǵa yqpal etetinine toqtaldy.
Nevskıı aýdany ardagerler keńesiniń tóraǵasy Mıhaıl Shevchýk Aqtóbe halqynyń yqylasyna rızashylyqtaryn jetkizdi. Al atalǵan aýdan ákimshiliginiń jastar saıasaty jáne qoǵamdyq uıymdarmen baılanys bóliminiń bastyǵy Andreı Lıabın Aqtóbe qalasynda jasaqtalǵan №74 derbes teńiz atqyshtar brıgadasy men myńdaǵan qazaqstandyqtardyń Lenıngrad qalasyn qorǵaýǵa qatysqanyn, Qazaqstannyń qorshaýdaǵy qalaǵa azyq-túlik, qarý-jaraq jáne jyly kıim jetkizip turǵanyn aıtty. Sondaı-aq, ol Aqtóbedegi soǵys ardagerlerine «1941-1945 jyldardaǵy Uly Otan soǵysyndaǵy Jeńiske 70 jyl» merekelik medalin jáne eskertkish syılyqtaryn tabys etti. О́z kezeginde aqtóbelikter tarapynan da eskertkish syılyqtar usynyldy.
Sonymen qatar, qonaqtar «Máńgilik alaý» dańq memorıaly janyndaǵy «Sol jyldarǵa bas ıemiz» aksııasyna qatysty. Delegasııa Keńes Odaǵynyń Batyry Álııa Moldaǵulovanyń memorıaldyq keshenine jáne Batyrlar alleıasyna gúl shoqtaryn qoıýdy josparlap otyr. Odan bólek, qalanyń birqatar kásiporyndary men mýzeılerinde, joǵary jáne arnaýly orta oqý oryndarynda bolyp, eńbek ujymdarymen jáne stýdenttermen kezdespek.
Satybaldy Sáýirbaı.
Derek, sýret: egemen.kz.
