Fýtbol. Eýropa lıgasynyń irikteý kezeńi bastaldy

ASTANA. 3 shilde. Keshe fýtboldan ÝEFA Eýropa lıgasyna irikteý kezeńiniń birinshi oıyndary oınaldy. Bul synda el namysyn úsh birdeı komandamyz qorǵaýda. Olar: «Aqtóbe», «Ordabasy» jáne «Qaırat». Alǵashqy ekeýi kezdesýlerin óz alańdarynda ótkizse, «Qaırat» Serbııaǵa qonaqqa bardy. Bul týraly egemen.kz habarlady. «Ordabasy» (Shymkent, Qazaqstan) – «Beıtar» (Ierýsalım, Izraıl) 0:0 Shymkentte «Ordabasy» Izraılden kelgen «Beıtar» komandasyn qabyldady. Qaraǵandynyń «Shahteryn» jattyqtyrǵan kezinde negizinen qorǵanysqa den qoıatyn maman Vıktor Kýmykov bul joly «Ordabasy» oıynshylaryn shabýylǵa jiberdi. Onyń bul tásili óz jemisin berip, shymkenttikter birinshi taımda birneshe ótkir shabýyldar uıymdastyrdy. Bul rette «Ordabasy» sapyndaǵy ózbekstandyq legıoner Aleksandr Geınrıhtiń oıyn órnegin erekshe aıtyp ótken jón. Ekinshi taımda da alań ıeleriniń basymdyǵy baıqaldy. Degenmen, tóreshiniń ysqyryǵy estilgenge deıin esep ashylǵan joq. Match barysynda shymkenttikter 14 ret qaqpaǵa soqqy jasasa, qarsylastar 6 márte nysanaǵa dop baǵyttap kórdi. «Aqtóbe» (Aqtóbe, Qazaqstan) – «Nymme Kalıý» (Tallın, Estonııa) 0:1 (0:0) Gol: Atsý Pýre 72. Kelesi oıyn Aqtóbede oınaldy. Jergilikti «Aqtóbe» Estonııadan kelgen «Nymme Kalıý» komandasymen kúsh synasty. Barlyq statıstıkalyq kórsetkishter boıynsha aqtóbelikter basym bolǵanymen, oıyn nátıjesi qonaqtardyń paıdasyna 1:0 bolyp tirkeldi. Qarymta shabýyldardyń birinde estondar qorǵaýshylarymyzdyń qateligin utymdy paıdalanyp ketti. 72-mınýtta soǵylǵan sol gol oıyn taǵdyryn sheshti. «Srvena Zvezda» (Belgrad, Serbııa) – «Qaırat» (Almaty, Qazaqstan) 0:2 (0:1) Goldar: Jerar Goý 45, Ermek Qýantaev 64. Al «Qaırat» Serbııada sol eldiń dańqty komandasy «Srvena Zvezdaǵa» qarsy alańǵa shyqty. Oıyn birden qonaqtardyń shabýylymen bastaldy. Matchtyń 2-mınýtynda qaqpashymen betpe-bet kelgen «Qaırat» shabýylshysy Jerar Goýdy qorǵaýshy Savo Pavıchevıch ruqsat etilmegen ádispen toqtatty. Nátıjesinde tóreshi birden qyzyl qaǵaz kórsetip, ony alańnan qýdy. Bul jaıt «Srvena Zvezdanyń» oıyn josparyna aıtarlyqtaı ózgeris ákeldi. Al «Qaırat» oıynshylary basymdyqty óz qoldaryna alyp, match sońyna deıin birinshi nómirmen oınady. Nátıjesinde almatylyqtar ár taımda bir goldan soǵyp, 2:0 esebimen jeńiske jetti. Aıta keteıik, qarsylastar 9 shildede qarymta oıyndaryn ótkizedi. Ol kezde erejege sáıkes «Qaırat» óz alańynda oınasa, «Aqtóbe» men «Ordabasy» qonaqqa barady. Elaman Qońyr. Derek: egemen.kz. Sýret: sports.kz.