Handar tarıhy qamtylǵan

Keshe Astanada Qazaqstan Prezıdenti janyndaǵy Ortalyq kommýnıkasııalar qyzmetinde Qazaq handyǵynyń 550 jyldyǵyna arnalǵan «Qazaq handary» atty tarıhı-tanymdyq kitaptyń tanystyrylý rásimi ótti. Qalyń kópshilikke usynylyp otyrǵan kitapta elimizdiń tarıhy, Kereı men Táýke han aralyǵyndaǵy 17 hany týraly qysqasha ári barshaǵa uǵynyqty tilmen jazylǵan. Atalǵan basylym jalpyǵa ortaq qazaq, orys, aǵylshyn tilderinde jaryq kórip otyr eken. Ǵylymı eńbektiń bir ereksheligi dástúrli soqpaqpen emes, jańashyl jolmen oqyrman qaýymǵa jol tartqanyn basa aıtsaq deımiz. «Bul taza ǵylymı monografııalyq eńbek emes. Kerisinshe, kópshilikke túsinikti bolý úshin jazylǵan ǵylymı tanymdyq dúnıe. Ásirese, jınaqtyń dızaınyna erekshe nazar aýdarylǵan. Ishindegi sýretterdiń barlyǵy elimizdiń orta ǵasyrdaǵy kezeńinen jan-jaqty kórinis beredi. Tarıhı eńbekter aqtańdaq jyldardyń shyndyǵyn ashyp qana qoımaı, keıingi urpaqqa túsinikti bolýyn da basty nazarda ustady», deıdi kitap avtory, tarıh ǵylymdarynyń doktory Bereket Káribaev. «Kitap jaryqqa shyqqannan keıin bizge Polsha men Bolgarııadan habarlasyp, ony satyp alýǵa tapsyrys berdi. Sonymen qatar, Polsha tarapy ony óz tilderine aýdarýǵa nıet bildirdi. Biz qazir bul eńbekti óz tarapymyzdan qytaı tiline aýdarýǵa nıettenip otyrmyz. Munymen qosa, sheteldegi qandastarymyz úshin kitapty tóte jazýmen shyǵarýdy da qarastyrýdamyz. Qazirdiń ózinde suranys kóp bolǵandyqtan kitaptyń taralymyn arttyrý jospary bar», – dedi «Sardar» baspa úıiniń dırektory Ádil Qoıtanov. Sheber qolmen bezendirilgen kitap barlyq jastaǵy oqyrmandy qyzyqtyrary sózsiz. Sondaı-aq, ustazdar mektep baǵdarlamasyna qosymsha qural retinde paıdalanýǵa da bolady. Jyl sońyna qaraı professor B.Káribaev Qazaq handyǵy týraly taǵy eki tomdyq zertteý eńbegin jaryqqa shyǵarýdy josparlap otyrǵan kórinedi. Dınara DOSPAN.