Golovkınniń kelesi jekpe-jegi ótetin kún belgili boldy

ASTANA. 6 qańtar. Kásipqoı boksta el namysyn abyroımen qorǵap júrgen otandasymyz, orta salmaqta WBA (Super), IBO, WBC (Interim) jáne IBF tujyrymdary boıynsha álem chempıony Gennadıı Golovkın kelesi kezdesýin 23 sáýir kúni AQSh-tyń Nıý-Iork qalasynda ótkizedi. Bul týraly allboxing.ru portalyna silteme jasaǵan egemen.kz tilshisi habarlady. Boksshynyń promoýteri Tom Leffler dál sol kúnge Nıý-Iorktegi ataqty Madison Square Garden arenasyna tapsyrys berip qoıǵan. Ázirge otandasymyzdyń qarsylasy kim bolatyny belgisiz. Keıbir derekterde onyń IBF tıtýlynan mindetti úmitker, Bagam araldarynyń ókili 31 jastaǵy Týreano Djonson bolýy múmkin ekeni aıtylǵan. Golovkınniń menedjeriniń sózine qaraǵanda, basqa da nusqalar qarastyrylýda. Máselen, orta salmaqta WBO tujyrymy boıynsha álem chempıony 26 jastaǵy ulybrıtanııalyq Bıllı Djo Sonderske usynys jasalǵan. Aıta keteıik, Dúnıejúzilik boks keńesi (WBC) orta salmaqtaǵy álem chempıondary Saýl Alvares pen Gennadıı Golovkınge qatysty óz sheshimin shyǵardy. Soǵan oraı qos boksshy ózara kezdesý úshin kem degende taǵy bir jekpe-jekten ótkizip, ataqtaryn qorǵap qalýlary tıis. Qos tarapta 31 mamyrǵa deıin ýaqyt bar. Eger atalǵan merzimge deıin eki jaq naqty kelisimge kelmese, promoýterlik saýda uıymdastyrylady. О́tken jyly qazaqstandyq sańlaq úsh kezdesý ótkizip, barlyǵynda jeńiske jetti. Sonyń ishinde kanadalyq Davıd Lememen bolǵan jekpe-jektiń shoqtyǵy bıik. Osy aıqastan keıin Golovkın jeńis serııasyn 34-ke jetkizip qana qoımaı, qatarynan 21 ret qarsylastaryn nokaýtqa túsirip, álemdik rekordty jańartty. Elaman Qońyr. Derek: allboxing.ru. Sýret: vk.com.