Dúnıejúzi qazaqtary qaýymdastyǵynyń «Parlament Májilisin taratý jáne QR Parlamenti Májilisi depýtattarynyń
saılaýyn kezekten tys ótkizý týraly» Jarlyqqa baılanysty
MÁLIMDEMESI
Dúnıejúzi qazaqtarynyń qaýymdastyǵy depýtattardyń mańyzdy bastamasyna qatysty Prezıdentimizdiń oń sheshim qabyldaǵanyn asa zor yqylaspen qabyl aldy. Májilis jáne barlyq deńgeıdegi máslıhattar depýtattarynyń saılaýlaryn kezekten tys ótkizý ulttyń Máńgilik Elge aınalý muratyna jetýde asa mańyzdy ári taǵdyrly qadam dep sanaımyz. Saılaýdy álemdik daǵdarystyń kezekti tolqynyna deıin ótkizip úlgersek, syrtqy syn-qaterdiń salmaǵy jeńil bolary sózsiz. 5 ınstıtýttyq reformany júzege asyrýda eshnársege alańdamaı, bılik, memlekettik qurylym jáne azamattyq qoǵam bolyp uıymdasyp jumys isteý asa mańyzdy. Osy oraıda, jańadan jasaqtalatyn Parlament osynaý memleket quraýshy úsh qýatty bir maqsatqa jumyldyra alady degen oıdamyz. Táýelsizdigimizdiń aq tańy atqan tusta qushaq jaıyp, tórden oryn usynǵan Elbasynyń janashyrlyǵy jyraqta júrgen mıllıondaǵan qandasymyzdyń tarıhı Otanyna oralýyna múmkindik berdi. Búginde olar qoǵamnyń túrli salalarynda jemisti eńbek etip, qasterli Qazaqstanymyzdyń damýyna súbeli úles qosyp júr. Sonymen birge, Uly Dala elinen tysqary jerdegi árbir baýyrlasymyzben tyǵyz rýhanı baılanys ornatylyp, týǵan ólkeniń qamqoryn syrtta júrgen árbir qazaq sezinýde. Osyǵan oraı, jahan qazaqtarynyń uıytqysy bolǵan uıym retinde Dúnıejúzi qazaqtarynyń qaýymdastyǵy Elbasynyń depýtattar usynǵan bastamaǵa oń sheshim bildirip, tıisti Jarlyqqa qol qoıǵanyn joǵary baǵalaıdy jáne osy iste úzeńgiles bolýǵa ázir ekenin málimdeıdi.
