Ár partııa saılaýǵa qatysýǵa mindetti

Bizdiń maqsat – túrli salalarda ulttyq múddemizdi qorǵaý, myqty memleket qurý. Ol úshin barshaǵa belgili, myqty ekonomıkaǵa súıený qajet. Qazirgi geosaıası kúrdeli ahýal­da jaýapty ári tyń sheshimderdi qabyldaý qajettigi týyndap otyr. Osyndaı usynystyń bolaryn sezdik ári daıyn boldyq. Sebebi, qazirgi jaǵdaılar osyndaı sheshimderge úndeıdi. Osylaı dedi «Aq jol» demokratııalyq partııasynyń tóraǵasy Azat Perýashev. Onyń aıtýyna qaraǵanda, aldaǵy Májilis pen máslıhattar saılaýyna partııa tarapynan qyzý daıyndyqtar júrip jatyr. Osynyń aldyndaǵy saılaý naýqanynda 10 baǵyttan turatyn saılaýaldy tujyrymdamamyzdy usynǵan bolatynbyz. Sol sııaqty, osy saılaýda da birneshe baǵyttar boıynsha jumys isteımiz, deı otyryp olardyń qatarynda táýelsizdik jáne ulttyq múdde, naryqtyq ekonomıkaǵa baǵyttalǵan jekeshelendirýdi qoldaý, jemqorlyqqa qarsy kúres, sheteldik bank­terge shyǵarylǵan qarajattardy elge qaıtarý, demokratııalyq ınstıtýttardy damytý sekildi ustanymdardyń bar ekendigin aıtty. Jalpy alǵanda, kez kelgen partııa saılaýǵa daıyn bolýy qajet. Jáne de saılaýǵa qatysý ár saıası partııanyń negizgi mindetteriniń biri, dedi A.Perýashev. Sondaı-aq, ol áskerı kúshterdiń soǵysqa qatysatyndyǵy nemese soǵysqa daıyndalatyny sekildi, partııalar da saılaýǵa daıyndalatynyn jáne oǵan qatysatyndyǵyn mysalǵa aldy. Saılaýǵa daıyndyq jumystarynyń barysyna keńirek toqtalǵan partııa tóraǵasy, búgingi kúni partııanyń ortalyq apparaty men oblystardaǵy fılıaldary shtab quryp, onda basshylar taǵaıyndalyp, qyzý jumys jasalynyp jatqandyǵyna toqtaldy. Partııanyń saılaýǵa qatysýy jóninde sheshim qabyldaý qajet. Ony elimizdiń zańyna sáıkes basqarýshy organ retinde partııa sezi sheshedi. Bul rette sezdiń 3 aqpanda ótetindigin málimdegen partııa tóraǵasy halyq qalaýlylaryna degen jurtshylyqtyń senimi úlken mańyzǵa ıe ekendigin atap aıtty. Sol sebepti, aldaǵy saılaýǵa bizdiń partııa joǵary daıyndyqpen bara jatyr. Bul rette jumysymyzdy belsendi túrde atqarýdamyz. Osy ýaqyttarda jergilikti jerlerde, oblystyq jáne qalalyq aımaqtarda konferensııalar ótkizýimiz qajet. Qazirgi ýaqytta partııa atynan saılaýǵa túsetin úmitkerlerdiń tizimin bekitý jumystary júrgizilýde. Úmitkerlerimizdiń tizimi anyq bolǵannan keıin, senimdi ókilderdi bekitýge kóshemiz, dedi A.Perýashev. Elmıra MÁTIBAEVA, «Egemen Qazaqstan».