Tájikstan Parlamenti Rahmonnyń sheksiz ret saılanýyna ruqsat berdi

ASTANA. 23 qańtar. Tájikstan Parlamentiniń tómengi palatasy Konstıtýsııaǵa respýblıka basshysy Emomalı Rahmonnyń shek qoıylmaıtyn mólsherde saılaýǵa túsýine múmkindik beretin túzetýdi bekitip berdi. Bul týraly ras.kz-ke silteme jasaǵan egemen.kz habarlady. Buǵan deıin el Konstıtýsııasynyń 65-baby bir tulǵanyń qatarynan eki retten artyq prezıdent bolýyna tyıym salatyn edi. Endi qosymsha «Beıbitshilik pen ult birliginiń negizin qalaýshy – Ult kóshbasshysyna» atalǵan baptyń tórtinshi tarmaǵynda qarastyrylǵan bul shekteýdiń júrmeıtinin» ashyp kórsetip otyr. Al «Beıbitshilik pen ult biriliginiń negizin qalaýshy – Ult kóshbasshysynyń quqyqtyq mártebesi men ýákilettikterin konstıtýsııalyq zańnyń qamtamasyz etetini» ashyp jazylǵan. Túzetýler sondaı-aq, kandıdat úshin shekteýli jas mólsheriniń 35-ten 30-ǵa deıin túsiriletinin de qarastyrǵan. Eske sala keteıik, parlament «Beıbitshilik pen ult birliginiń negizin qalaýshy – Ult kóshbasshysy týraly» zańdy 2015 jylǵy 30 jeltoqsanda qabyldaǵan bolatyn. Osy ózgerister sondaı-aq, respýblıka prezıdenti Emomalı Rahmonnyń úlken uly Rýstam Emomalıdiń 2020 jyly ótetin prezıdent saılaýynda óziniń kandıdatýrasyn usynýyna múmkindik beredi. Sol jyly onyń jasy 33-ke keledi. Demek, qoldanystaǵy endigi Konstıtýsııaǵa sáıkes, Rýstam ózin memleket basshysynyń oryntaǵyna usyna alady. Depýtattar qoldaý kórsetken bul túzetýlerdiń barlyǵy respýblıka Konstıtýsııalyq sotynyń saraptamasyna jiberiledi. Sodan keıin «Tájikstan konstıtýsııasyna ózgertýler men qosymshalar engizý týraly» zańnyń jobasyn talqylaıtyn búkilhalyqtyq referendýmnyń ótkiziletin merzim belgilenedi. Talǵat Raıymbek. Derek, sýret: ras.kz.