Almatyda III Halyqaralyq «Syrlasý» festıvali ótedi

ALMATY. 28 qańtar. Almatydaǵy Qazaqstan baspasóz klýbynda «Syrlasý» festıvaliniń bastalýyna baılanysty baspasóz máslıhaty bolyp ótti. Bul týraly egemen.kz tilshisi habarlady. Baspasóz máslıhatynda festıvaldiń prodıýseri ári dırektory Olga Sultanova, Head of Arts British Council Kazakhstan ókili Galına Koreskaıa, ARTBATFEST Halyqaralyq zamanaýı óner festıvaliniń dırektory Olga Veselova jáne óner salasynyń menedjeri Irına Dýshkova (Lıtva)  sóz alyp, jýrnalısterdiń saýaldaryna jaýap berdi. Sonymen 1-7 aqpan aralyǵynda ótetin III Halyqaralyq «Syrlasý» oryndaýshylyq óner festıvali – elimizde zamanaýı teatrlardyń damýymen shuǵyldanatyn jáne táýelsiz teatrlar men teatrlyq jobalarǵa qoldaý kórsetetin qazaqstandyq biregeı joba. Eń alǵash ret «Syrlasý» festıvali 2013 jyly Almaty qalasynyń Mádenıet basqarmasynyń qoldaýymen ótkizilgen bolatyn. Al bıyl festıval halyqaralyq deńgeıge kóterildi, kóptegen jańa dástúrler paıda bolyp, aýqymy keńeıe tústi. Festıvaldiń basty maqsaty – teatr kórermenderiniń jańa býynyn qalyptastyrý. «Bıyl álemdik daǵdarysqa baılanysty memlekettiń qoldaýynsyz festıvaldi uıymdastyrý ońaıǵa soqpady. Biraq bizdiń baǵymyzǵa oraı, Almaty qalasyndaǵy áleýmettik jaýapkershiligi mol jeke kompanııalar qoldaý kórsetip otyr. Iаǵnı, festıval jalǵasyn tapty. Al eń bastysy osynyń arqasynda biz zamanaýı teatrdyń damýyn áli de qoldaı alamyz», – deıdi Olga Sultanova. Aınash Esalı. Derek, sýret: egemen.kz.