Nıý-Iorkte 200 myń zeınetker memlekettik baspana kezeginde tur

ASTANA. 28 qańtar. Nıý-Iorkte 200 myń zeınetker memlekettik baspanaǵa kezekte tur. AQSh turǵyn-úıdi damytý jáne qurylys departamentiniń tapsyrmasymen júrgizilgen zertteý qorytyndysy Nıý-Iork qalasynda qoljetimdi baspana máselesi ózekti ekenin kórsetken. Bul týraly newsru.com saıtyna silteme jasaǵan egemen.kz tilshisi habarlady. Daily News basylymynyń habarlaýynsha, jeńildikpen satylatyn nemese jalǵa beriletin memleket qarjylandyratyn páterler kezeginde qazirdiń ózinde 200 myń jasy kelgen qala turǵyny tur. Zeınet jasyndaǵy qarııalar bul páterlerdi ortasha eseppen jeti jyldaı kútedi. Tabysy óte tómen nemese ortasha tabysty keı qarııalardyń, sondaı-aq, múgedekterdiń kezekte turǵanyna 10 jyldyń júzi bolǵan. Zertteýdi júrgizgen LiveOn NY kompanııasynyń ókili Bobbı Sekmen: «Áleýmettik jaǵdaıy nashar qarttar úshin qoljetimdi baspana qajettiligi «óte joǵary» desek, osynyń ózi máseleni tolyq baǵalamaǵanymyz bolar edi», – deıdi. Kompanııa ókili bul jaǵdaıdy óz kezegin uzaq ýaqyt kúte almaıtyn qarttardyń kóptigi kúrdelendirip turǵanyn aıtady. Aıta keteıik, 2014 jyly Nıý-Iork qalasynyń basshylyǵy qaladaǵy qoljetimdi baspananyń damý naryǵy josparyn jarııalaǵan bolatyn. Josparda 80 myń jańa turǵyn úı qurylysy júrgizilip, barlyq bes bıýro boıynsha 120 myń páterdi qaıta qalpyna keltirý kózdelgen. Joba boıynsha tabysy az jáne ortasha qala turǵyndarynyń barlyǵyn on jyl kóleminde baspanamen qamtamasyz etýi boljalǵan. Al, jobany júzege asyrýǵa 40 mıllıard AQSh dollary jumsalady dep josparlanyp otyr. Elaman Qońyr. Derek: newsru.com. Sýret: news.tut.by.