Ilkimdilik

«Kásiptiń kózin tapqan – ómirdiń ózin tabady». Ejelden kele jatqan osy támsildiń ómirsheń­­­­digine kún saıyn kóz jetkizemiz. Ásirese, dál qazirgideı almaǵaıyp kezeńde áldebir kásipti ashyp, onyń jumysyn júıelep, naryqtaǵy baǵyt-baǵdaryn aıqyn­dap, dóńgeletip áketý degenińiz úlken kúsh. Onyń ústine, alypsatarlyqtyń da dáýreni ótip barady. Sondyq­tan óndirispen aınalysý tıimdi bolyp tur. Iri demeı, usaq demeı, óndiris salasyn damytsaq, onda shaǵyn jáne orta bıznestiń de kórkeıetini aqıqat. Jaqynda qyzylordalyq ká­sip­ker Aıkenje Muqanova nan ónim­derin shyǵaratyn kásiporyn ashty. Bul iste kásipkerge memleket tarapynan da qoldaý boldy. Aıkenje Muqanova óz bıznesin eki jyl buryn bastaǵan. «Bıznestiń jol kartasy-2020» baǵdarlamasy aıasynda nesıe resimdep, jubaıy ekeýi «Serdse Tomırıs» bala­baqshasyn ashqan. Bul ıdeıa ká­sipkerler otbasyndaǵy úsh balasyn birdeı balabaqshaǵa ornalastyrýdy oılastyrǵanda kelgen eken. Bızneste tájirıbeleri joq bolsa da, óz kásibin ashsam degen yntasy bar azamattar tez arada óz kásipterin dóńgeletip áketken. Osylaısha, isi alǵa basqan kásipker endigi jerde ju­mys aýqymyn jan-jaqty keńeı­týdi josparlap, «Damý» qo­ryna keńes alýǵa júginedi jáne bastaýysh kásipker retinde «Damu Start-up» baǵdarlamasy arqyly nesıe resimdeýge keńes aldy. Kóp oılanbastan sheshim qabyldaǵan A.Muqanova «Damý» qorynyń 70 paıyz kepildendirýi arqasynda naýbaıhana qurylysyna 20 mıllıon teńge nesıe resimdep, búginde óndiris nysany óz esigin aıqara ashyp, qyzmet kórsetýde. – Naýbaıhanamyzdyń ashyl­ǵanyna áli kóp bolmasa da, jumysymyz qarqyndy júrip jatyr. Táýlik boıy qyzmet kórsetemiz jáne birinshi kezekte sapaly ári dámdi ónimdi shyǵarýdy maqsat etemiz. Kásiporynda nannyń birneshe túrin dámdi etip ázirleıtin naǵyz bilikti mamandar jumys jasaıdy. Ázirge biz tek 7 jumys ornyn ashtyq, alaıda, josparymyzda naýbaıhana ishinen kondıterlik ónimderdi shyǵarý baǵytyn iske qosyp, jumys ónimdiligin arttyrýdy kózdeımiz. Bul da bolsa jańa jumys oryndaryn ashýǵa óz septigin tıgizeri sózsiz. Kezinde balabaqshany ashqanymyzda, tájirıbemiz az bolsa da negizgi maqsatymyzǵa jetemiz degen oıymyz bıznestiń jańa kezeńin júzege asyrýǵa ákeldi jáne biz tabysqa jetetinimizge senimdimiz. Jumys berýshi retinde otbasyń men qaramaǵyńdaǵy adamdardyń aldynda úlken jaýapkershilikti arqalaıtynyń anyq. Sondyqtan óz bıznesińdi kedergiler men qıyn­dyqtarǵa qaramastan júzege asyrý tabandy eńbekti qajet etedi,– deıdi kásipker. Erjan BAITILES, «Egemen Qazaqstan». Qyzylorda oblysy.