Enjarlyqty eńserý

Buryndary óńirdegi eńbekpen túzetý mekemelerin jumyspen qamtamasyz etý mindeti «Qy­zyljar-Eńbek» JShS-ne júkte­lip kelgen. Alaıda, seriktestik daǵ­­darys qyspaǵyna shydaı almaǵandyqtan bankrottyqqa ushyraǵan. Osyndaı qysylshań tusta Úkimet arnaıy qaýly qa­byldap, áriptestikke shaǵyn jáne orta bıznes ókilderin tartý, olardyń múmkindikterin paıdalaný, bas erkinen aıyrylǵan jandardy oqytý arqyly qosymsha kásipke daıarlaý sekildi túıindi máselelerdi rettep berdi. Mun­daı sheshimdi tyǵyryqtan shy­ǵýdyń amal-ádisteri retinde qa­byldaǵan Qylmystyq atqarý júıesi oblystyq departamentiniń basshylyǵy dereý iske kirisken. Jazasyn óteýshilerdi naryq suranysyna laıyq mamandyqqa ázirleý, júıeli jumyspen qamtý sharalary keń óris alyp, semınar-oqýlar uıymdastyrylǵan. – О́ńir aýmaǵynda ornalasqan 6 eńbekpen túzetý mekemelerinde eki myńǵa jýyq adam jazasyn óteıdi. Eńbekke jaramdylardyń 54 paıyzy nápaqalaryn adal aıyrady. Bul – jaman kórsetkish emes. 10-ǵa jýyq kásipkermen tyǵyz qarym-qatynas ornatýdyń arqasynda kıim tigý, aǵash óńdeý, temir qańqalaryn qurastyrý sehtary jumys isteıdi. Alda 400 sottalýshy 5 mamandyq bo­ıynsha bilimderin jetildiretin bolady. Ol úshin kýrstar sany kóbeıtilip, kásiptik-tehnıkalyq kolledjdermen qarym-qatynas nyǵaıtylady, – dedi Qylmystyq atqarý júıesi oblystyq depar­tamentiniń sottalǵandardyń eń­begin uıymdastyrý jónindegi bas maman Qanat Súleımenov. Temir tordyń arǵy jaǵynda jazasyn ótep jatqandardyń qıly taǵdyryna alańdap, alǵash qol sozǵandardyń biri – «Shegolev» jeke kásipkerligi. 2012 jyly ES–164/4 túzetý mekemesinde monshaǵa qajetti buıymdar shyǵaratyn seh ashyp, 10 jumys ornyn qurǵan. Byltyr jumysshylar sany 120-ǵa jetken. Evgenıı Shegolevtiń aıtýynsha, onyń mundaı qadamǵa barýyna memleket tarapynan jasalǵan qamqorlyqtar túrtki bolǵan. Ǵımarattardy jalǵa alý aqysy tegin. Basqadaı da jeńil­­dikter qarastyrylǵan. Endi tigin sehyn iske qosýdy maqsat etip, qajetti qural-jabdyqtar Reseıden ákelinipti. Abaqty ishinde ornalasqan kásibı lıseıde oqyp jatqan 25 qyz-kelinshek tiginshi mamandy­ǵyn alyp shyǵady. Budan tys­qa­ry 10 adam aýyldyq jerlerge ań­shy, balyqshylarǵa arnap kıim­der tigýmen aınaly­sady. Jóke toqý óndirisi de jolǵa qoıylǵan. Kásipkerdiń endigi bir oıy – jylyjaı quryp, gúl­der, aǵash kóshetterin ósirý. Bir qýantarlyǵy, ónimder elimiz bo­ıynsha taraıdy. – Áıelder kolonııasyndaǵy 200 sottalýshynyń 90 paıyzy eńbekpen qamtylǵan. Bos ýaqyttaryn bilim alýǵa bolmasa eńbektenýge jumsaıdy. Jyl ótken saıyn qol qýsyryp otyrýshylar qatary azaıyp ke­ledi. Bostandyqqa shyqqannan keıin de bir qajetine jaratary anyq. Mańdaı termen tapqan eńbekaqylary sot sheshimimen belgilengen qaryzdaryn óteýge jumsalady. Qalǵandaryn otbasyna jibere me, álde jeke qa­jetine jarata ma, bolmasa esep­shotta saqtaı ma – erki,– deı­di bólimshe bastyǵy Maıa Ramazanova. Búginde 125 jazasyn óteý­shi kásibı-kolledjderdiń shá­kirt­teri esebinde tiginshi, tas qalaýshy, sylaqshy, gazben dá­nekerleýshi mamandyqtaryna baý­lynýda. Arnaıy kabınetterdi jabdyqtaýǵa byltyr 1 mıllıon 862 myń teńge jumsalsa, bıyl 2 mıllıon 185 myń teńge bólingen. Departamentte qysqa kýrs­tardy aıaqtaýshylardy ju­mys­qa ornalastyrý birinshi ke­zektegi másele sanalady. О́z­ara kelisimsharttarǵa sáıkes «Sa­lıkov» jeke kásipkerligi – 26, «Laıf» JShS – 10, «Ysqaqov» jeke kásipkerligi 7 adamǵa jumys taýyp bergen. Aıyrtaý aýdanynda ornalasqan túzetý mekemesinde 4 jeke kásipker aǵash materıaldaryn óńdeýmen aınalysyp, 30 adam eńbekke tartylǵan. О́mir ESQALI, «Egemen Qazaqstan». Soltústik Qazaqstan oblysy.