Kópbaevtar kóp bolsa!

  Buqaralyq sport degende qalalyqtardyń qaǵanaǵy qarq, saǵanaǵy sarq. Úıden attap shyqsań boldy – tańdaǵan sportyńnyń jalyna qol salasyń... Osyǵan qarap otyryp aýyldyqtardy aıaısyń. Jazdy qoıshy, topyraqty shańdatsań da dop teýip, fýtbol oınaısyń. Al qys balasy she? Keshke qaraı jumysynan kelip, malyn jaıǵap bolǵan soń bir ýaq deneniń qurys-tyrysyn jazaıyn dese jurttyń barar jeri joq. Mekteptiń aıadaı ǵana sport zalyna soqtaldaı-soqtaldaı jigitter qaıdan syıa qoısyn jáne de qalaı degenmen de, oqýshy balalarǵa arnalǵan memlekettik mekeme ǵoı ol. Túneýgúnge deıin Jańaarqa aýdanyn­daǵy Túgisken degen aýyldaǵy ahýal da týra osyndaı bolyp kelgen edi. Al qazirgi jaǵdaıy adam tanymastaı ózgergen. Aıa­daı ǵana aýylda jergilikti sharýa qoja­lyǵynyń basshysy Qaırat Kópbaev degen myrza qaltasynan 110 mıllıon teńge shyǵaryp, sport keshenin salyp berdi. Álbette, túkpirdegi Túgiskenge osyndaı tartý jasaǵan fermerdiń bul tirligin «Bız­nestiń áleýmettik jaýapkershiligi» dep te jalaýlatýǵa bolady. Prezıdentimizdiń kásipkerlerdi eldiń muqtajyna qaraı­lasýǵa shaqyrǵan úndeýine múbárak ispen jaýap bergen irilik dep baǵalaǵanǵa da syıady munyńyz. Qalaı degenmen de, Qaırat Kópbaev degen atymtaı-jomart azamattyń týǵan jerge degen perzenttik ma­habbaty men úlken adamgershi­ligin aýyzǵa aldymen alǵan jón shyǵar. Qaırekeńniń ózi kópbalaly otbasynan shyqqan. Eńbekpen kózin tyrnap ashqan jan. Osy kúnine óz mańdaı terimen jetken er eken. Búginde eńbegi janyp, tasy órge domalaǵan. О́zinen artylǵanmen aǵaıynǵa qaraılasyp, endi, mine, týǵan aýylyna da sharapatyn tıgizip otyr. Kósegeń kógergir Kópbaevtyń «Maqsat» dep atalatyn sharýa qojalyǵy qazaqtyń aqbas tuqymdy sıyryn ósirýmen aınaly­sady. Búgingi kúnde atalǵan sharýa qoja­lyǵynda 30-ǵa tarta adam eńbek etip, bala-shaǵasyn asyrap jatyr. Kásipkerdiń bolashaqqa degen jospary da kóńil súısintedi. Aldaǵy ýaqytta ol sport keshenine japsarlastyryp basseın salmaqshy. Odan keıin kishigirim qo­naqúı de boı kótermek. Bul degenińiz, Túgis­ken­ge túkpir-túkpirden sportshylar kelip, sport­tyń nesheme túrinen týrnırler ótedi degen sóz. Sodan keıin kásipker eki «GAZel» avto­kóligin satyp almaqshy. Birin mektepke, ekinshisin sportshylarǵa tartý etpek. Aýyldyń azamaty osyndaı ıgi isterdi tyndyryp tastaǵanda aýdan, oblys basshylary da syrttan baǵyp qana turmady. Aýdan ákimi Ǵabdrahman Omarov ózi qadaǵalap, kásipkerge qurylysqa dep jer berdi, sý, elektr jáne jylýmen qamtamasyz ettirdi. Al oblystyń ákimi jańa sport keshenine dep kúres kilemin syıǵa tartty. Bul kilem sol kúni uzyndyǵy 36 metr bolatyn sport zalyna tóseldi. Zaldyń bos qalǵan ekinshi jartysyna voleıbol, basketbol jáne mını-fýtbol oınaýǵa ábden bolady. Jalpy, bul jerde sportshy qaýymǵa barlyq jaǵdaı jasalǵan. Sheshinetin jer, jýynatyn bólmeler, jattyǵý zaly bar. Qalanikinen bir de kem emes. Jańa sport kesheni bilikti maman – jat­tyqtyrýshysyz jetimsirep turar edi. Al bul jaǵynan túgiskendikterdiń joly boldy dep nyq senimmen aıtýǵa bolady. О́ıtkeni, aýylda kúrestiń jiligin shaǵyp, maıyn ish­ken mamandar barshylyq. Solardyń biri – Túgisken orta mektebinde dene tárbıesi pániniń muǵalimi bolyp jumys isteıtin Halıl Ábenov. Halıldiń ózi kezinde kú­res­ken, KSRO sport she­beri, qazir dzıýdo jáne qazaq kúresinen jattyqtyrýshy. Onyń shákirtteri de biraz belesterdi baǵyn­dyrypty. Búgingi kúnde sport kesheni 80 paıyzǵa kerek-jaraqpen jabdyqtalǵan. Jetispegen sporttyq quraldarǵa tapsyrys berilipti, qaladan áne-mine ákelinýi tıis dep kútip otyrǵan jaılary bar. Jańa sport kesheniniń saltanatty jaǵ­daıda ótken ashylý rásiminde aýyl aq­saqaly Qojantaı Omarovtyń aq batasynan keıin, Jańaarqanyń jam­pozy, sambo kúresinen Álem ký­bo­gy­nyń ıegeri, Qazaqstannyń eńbek sińir­gen jat­tyq­ty­rýshysy, búgingi kún­de Olım­pıada re­zerv­terin daıarlaý orta­lyǵynyń dırektory bolyp qyzmet etetin Janat Baısholaqov quttyqtaý sóz sóıledi. Memleket basshysy óziniń kezekti bir Joldaýynda 2020 jylǵa deıin qa­zaq­tandyqtardyń 30 paıyzy buqaralyq sportpen shuǵyldanýy kerek degen mindet qoıdy. Qý taqyrǵa shóp shyqpaıtyny sekildi, sporttyq ınfraqurylym bolmasa, maqsaty aıqyn bul mejege qoljetkize qoıýdyń ózi qııamet-qaıym is qoı. Al bul baǵytta Túgiskenniń upaıy túgel. О́ıtkeni, bul aýylǵa sportqa degen janashyrlyqtyń dáni sińgen. Qaırat ÁBILDINOV, «Egemen Qazaqstan». Nurlan ÁBILDIN, jýrnalıst. Qaraǵandy oblysy, Jańaarqa aýdany.