Aqtóbede túlekterdi jumysqa bólý sharasy ótkizildi

AQTО́BE. 12 aqpan. Aqtóbe qalasyndaǵy Marat Ospanov atyndaǵy Batys Qazaqstan memlekettik medısına ýnıversıtetinde oblys aımaǵynda jumys isteýge nıetti túlekterdi aldyn ala jumysqa bólý sharasy uıymdastyryldy. Bul týraly egemen.kz tilshisi habarlady. Sharaǵa aýdan ákimderiniń orynbasarlary men qalalyq jáne aýdandyq aýrýhanalardyń bas dárigerleri qatysyp,túlekterdi ózderine jumysqa shaqyrdy. Oblystyq densaýlyq saqtaý basqarmasynyń derekterine súıensek, aımaqta reanımatolog, ftızıatr jáne jalpy tájirıbe dárigeri syndy 94 maman jetispeıdi eken. Jıynǵa qatysqan oblys ákiminiń orynbasary Asqar Sherııazdanov oblystyń densaýlyq saqtaý salasy jyl ótken saıyn damyp kele jatqanyn, sondyqtan jas mamandarǵa suranystyń joǵary ekenin aıtty. Bıylǵy jyly osy ýnıversıtetti alty mamandyq boıynsha 546 túlek bitiredi. Onyń ishinde 100 akýsher-gınekolog pen pedıatrlar mindetti túrde rezıdentýrada bilimin jalǵastyrady. Sondaı-aq, oblystan tysqary Batys Qazaqstan, Mańǵystaý, Atyraý, Qyzylorda oblystary úshin jalpy tájirıbedegi terapevt, hırýrg, stomatolog sekildi tórt júzge jýyq maman daıarlanǵan. Bizdiń óńirde 76 túlek qalýdy josparlasa, 80 túlek ózge oblystarǵa attanbaq. Al 56 túlek rezıdentýrada oqıdy. Derek kózinen belgili bolǵanyndaı, jyl saıyn ýnıversıtet túlekteriniń 85 paıyzy jumysqa ornalasady. Bolashaq dárigerlerdi jumysqa ornalastyrýdyń bul jolǵy sharasy Aqtóbe óńiriniń medısınalyq uıymdaryna arnalyp uıymdastyrylsa, kelesi jıyn elimizdiń batysyndaǵy ózge aımaqtaryn qamtıtyn bolady. Satybaldy Sáýirbaı. Derek: egemen.kz. Sýret: zkgmu.kz.