ASTANA. 12 aqpan. Norvegııanyń Lıllehamer qalasynda jasóspirimderdiń Qysqy Olımpııa oıyndaryna qatysatyn Qazaqstan ulttyq qurama komandasynyń shtaby ashyldy. Bul týraly egemen.kz tilshisi habarlady.
Búgin shtabta Ulttyq olımpıada komıtetiniń ókilderi sportshylar men jattyqtyrýshylar quramymen kezdesti. Kezdesýde komıtettiń vıse-prezıdenti Andreı Krıýkov pen atqarýshy dırektory Serik Qasqabasov sportshylardyń daıyndyǵyn surastyryp, olımpııalyq qalashyqtaǵy jaǵdaılarymen tanysty.
«Olımpıada árbir jas sportshynyń ómirindegi mańyzdy jarystardyń biri. Sondyqtan osy jerde ózderińdi jaqsy qyrynan kórsetýlerin kerek. Bizdiń el sendermen maqtanady. Elde barlyǵy senderge úmit artyp otyr», dedi Andreı Krıýkov.
Kezdesýde jarystyń ashylý saltanatynda elimizdiń kók baıraǵyn ustap júretin short-trekshi Erkebulan Shamuqanov barlyq sportshylardyń atynan Qysqy Olımpıadaǵa jaqsy daıyndyqpen kelgenderin, jarys kezinde sportshylar bir-birlerin qoldaıtyndaryn aıtty.
«Biz Lıllehamerde bir otbasynyń balalary sııaqtymyz. Bir-birimizge bilmegen nársemizdi aıtyp, kómek kerek bolsa kómektesip júremiz. Biraq, eń bastysy jarysta jaqsy óner kórsetip, elge altyn júldelerdi sanap ákelý dep bilemin. Sondyqtan namysty qoldan bermeı, kók baıraǵymyzdy Norvegııanyń aspanynda jelbiretýge tyrysatyn bolamyz», dedi ol
Olımpıada kezinde Qazaqstan sportshylary jarysqa ǵana emes, basqa da mádenı sharalarǵa da qatysady. Mysaly, sportshylardyń «Hello, World!» («Álem saǵan bir sálem!») degen festıvalde álemniń túkpir-túkpirinen kelgen qurdastarymen jaqyn aralasýǵa múmkindikteri bolady. Onda ústel tennısinen jarystar ótip, bı keshteri ótkiziledi.
Dastan Kenjalın.
Derek, sýret: Qazaqstannyń Ulttyq olımpıada komıteti.
