«Qazaqstan» telearnasynda «Jambyl» fılmi kórsetiledi

ASTANA. 12 aqpan. Aqynnyń 170 jyldyq mereıtoıy qarsańynda «Qazaqstan» telearnasy Jambyl Jabaev týraly 4 serııaly tarıhı drama ázirledi. Bul týraly «Qazaqstan» RTRK aqpary boıynsha egemen.kz tilshisi habarlady. Fılm «Qazaqstan» arnasynda 28 aqpanda, ıaǵnı aqynnyń týǵan kúninde kórermender nazaryna usynylady. Aqyn ózinen keıin baı mura qaldyryp, qazaq ádebıeti men mádenıetine úlken úlesin qosty. Fılmde Jambyl Jabaevtyń shyǵarmashylyǵy men ómirlik joly tolyqtaı kórsetilgen. Fılmniń shyǵarmashylyq toby basty róldi somdaýǵa kóptegen tanymal ártisterdiń ishinen kóp ýaqyt boıy irikteý jasady. Nátıjesinde Jambyl róli Qazaqstan Respýblıkasynyń eńbek sińirgen qaıratkeri, «Daryn» memlekettik jastar syılyǵynyń laýreaty, akter, ánshi, kompozıtor, dramatýrg – Baıǵalı Esenalıevke berildi. Baıǵalı Esenalıevtiń aıtýynsha, aqynnyń beınesin ekranda somdaý ońaı emes. Sebebi túsirilim kezinde salmaq bas keıipkerge túsedi. «Meni aqynyń rólin somdaýǵa shaqyrǵanda, oılanbaı birden kelisimimdi berdim. Kastıngke kelsem, basty rólge úmitker retinde kóptegen tanymal akterlerdiń fotolary ilinip tur. Olardan ozyp júlde alý qaıda!?- dep oılanyp qaldym. Desem de barǵan soń baǵymdy synap kórýge bel býdym. Sol kúni sátti kún bolyp, konkýrstan ótip kettim. Rejısser syrtqy usqynyma qarap biraz salmaq tastaý kerek dedi» ,  dep eske alady Baıǵalı Esenalıev. Jambyl Jabaev kóp qyrly tulǵa. Onyń aqyndyǵyn bylaı qoıǵanda, jyr alyby aıryqsha sýyryp salma sheshendigimen tanymal. Jambyldyń poezııasy árdaıym qarapaıym halyqpen baılanysty bolǵan. Teleserıaldyń negizgi kórinisteri tabıǵaty ásem Almaty oblysynyń «Úshqońyr» baýraıynda, Jambyl oblysy men Máskeýde túsirildi. Ekranda tek qana tarıhı keıipkerdiń ómirbaıany emes, sonymen qosa HH ǵasyrdyń ortasyndaǵy elimizdiń sol dáýirdegi kórinisi kórsetilgen. Sonymen birge fılmde buǵan deıin kóp aıtyla qoımaǵan aqynnyń ómirinen alynǵan qyzyqty derekter kórsetiledi. Sonyń biri – Jambyl men Burymnyń bir birine degen mahabbaty jaıly bolmaq. Túsirilim toby dekorasııalarǵa, akterlerdiń kostıýmy men obrazdaryna jete kóńil bólip, ázirlegen. Sol arqyly Jambyl ómir súrgen dáýirdiń  tolyqtaı kórinisin kórsete aldy. Fılmniń rejısseri «Lave», «Jeńis semseri», «Qazyna» jáne taǵy basqa kınotýyndylardy túsirgen Ánýar Raıbaev. «Biz túsirip jatqan «Jambyl» kórkem fılmi 4 bólimnen turady. Qazaq sóz óneriniń «ımprovızasııa» úrdisin jańa arnaǵa buryp, jańasha mazmun darytqan Jambyl atamyz, qarapaıym qara sózdiń maıyn tamyzyp, talaı aıtysta jeńiske jetken, el aldynda bedeldi edi. Judyryqtaı júregine Jetisý men Alataýdy bylaı qoıǵanda, búkil álemdi syıdyra bilgen, dana aqynnyń elge qaldyrǵan atalyq, danalyq sózderin, el búginde aýzynan tastamaıdy. Júrgen jerinde, «myń ólip-myń tirilgen» barsha qazaqqa batasyn bergen Jambyldyń sol batasy búgingi kúni de jerde qalmaı, armany men oı órisi kókke órlegenine qazirgi «urpaq» biz kýá! Bizdiń maqsat Jambyl atamyzdyń «adamı» tulǵasy men qadir-qasıetin basqa qyrynan kórsetip, abyroıyn kókke órletý», deıdi fılmniń rejısseri Anýar Raıbaev. Kartınada Aıgúl Úlkenbaeva (Dına Nurpeıisova), Ilııas Turmanov (Lavrentıı Berııa), Áıgerim Sámenova (Kúlásh Báıseıitova), Jolaman Ámirov (Jabaı), Ergenbaı Ábýev (Súıinbaı), Nurbek Muqysh (Kenen Ázirbaev), Boranbaı Moldahmetov (Muhtar Áýezov), Qanat Júnisov (Sáken Seıfýlın), Kentaı Aqúrpekov (Temirbek Júrgenov), Baqyt Bedelhan (Baýyrjan Momyshuly) jáne taǵy da basqa belgili akterler oınaıdy. Dastan Kenjalın. Derek: «Qazaqstan» RTRK. Sýret: egemen.kz