«Sary qurlyqty» moıyndatqan

qazaqstandyq balýan Dosjan Qartyqov grek-rım kúresinen Azııa chempıony atandy Burnaǵy kúni Taıland astanasy – Bangkok qalasynda kúres túrlerinen, ıaǵnı erkin kúres, grek-rım kúresi jáne áıelder kúresinen Azııa chempıonaty bastaldy. Saıystyń birinshi jarys kúninde-aq qazaqstandyq «klassık» balýandar úsh birdeı júldege qol jetkizdi. Naqty aıtqanda, 75 kılo salmaqta el namysyn qorǵaǵan Dosjan Qartyqov qurlyq chempıony atansa, 66 kıloda baq synaǵan Ashat Jańbyrov kúmis medaldi moınyna taqty. Sondaı-aq, 80 kılo salmaq dárejesinde synǵa túsken Ashat Dilmuhamedov qorjynǵa qola medal saldy. Dosjan alǵashqy beldesýinde Taıpeı eliniń ókili Ven Sýn Lındi 12:2 esebimen tize búktirdi. Shırek fınalda Túrikmenstan senim artqan Shermet Permenovti 8:0 esebimen jeńip, aıqyn basymdyq tanytty. Al jartylaı fınalda parsy balýany Paıam Abdeh Salıhten 6:4 esebimen aılasyn asyrdy. Sheshýshi synda otandasymyz 2014 jylǵy Azııa oıyndarynyń kúmis júldegeri ózbekstandyq Dıl­shod Týrdıevpen kúresti. Fınalda da joǵary deńgeıde beldesken otandasymyz qarsylasyn 4:0 esebimen jeńip, Azııa chempıona­tynyń «altynyn» aldy. О́z kezeginde Ashat Jańbyrov Soltústik Koreıa, Japonııa jáne О́zbekstan balýandaryn jeńip, fınalǵa deıin súrinbeı jetken bolatyn. Degenmen, bul synda onyń ońtústikkoreıalyq Gıýk Cholǵa sha­masy jetpedi. Qola júldeger atanǵan Ashat Dilmuhamedov ekinshi beldesýinde ózi jeńilgen ırandyq Soltanmorad Tahersortangtyń fınalǵa shyǵýyna baılanysty úshinshi orynǵa talasý quqyna ıe boldy. Atalǵan aıqasta ol bar bol­ǵany 31 sekýndta Vetnamnan kelgen Dın Hıý Nıemniń jaýyrynyn jer ıisketip, júldege qol jet­kizdi. О́kinishke qaraı, bul kúni kilemge shyqqan taǵy bir qazaqstandyq, 98 kıloda kúresken Janarbek Qabdolov birinshi beldesýinde jeńgenimen, kelesi aınalymda Ońtústik Koreıa balýanyna jol berdi. Aıta keteıik, qurlyq chempıonaty 21 aqpanda aıaqtalady. Elaman QOŃYR, «Egemen Qazaqstan».