Kásipkerlerge qamqorlyq qoldaýdan bastalady

Qazirgi kezde kásipkerlikti qoldaýǵa barlyq jaǵdaılar jasalýda. Sonyń bir kórinisi «Nur Otan» partııasynyń qoǵamdyq qabyldaý bólmelerinde «Damý» Kásipkerlikti damytý qory» AQ-tyń Astana qalasyndaǵy aımaqtyq fılıaly dırektorynyń orynbasary Sáýle Ábisheva, Bank ombýdsmeni Erserik Sıyrbaev jáne ózge de sala mamandarynyń qatysýymen «Kásipkerlerdi biryńǵaı qabyldaý kúnin» ótkizý boldy. Elimizdiń barlyq óńirlerin­de ótip jatqan osyndaı is-sha­ra­larǵa úlken mańyz berilip otyr. О́tken jyly partııanyń barlyq aımaqtyq jáne aýmaqtyq fılıaldarynyń 200-den astam qoǵamdyq qabyldaý bólmelerinde kásipkerlik máseleleri boıynsha 2 myń azamatqa jan-jaqty kómek berilse, ústimizdegi jyldyń tek qańtar aıynyń ózinde 150-den astam adam óz suraqtaryna jaýap taýyp, solardyń keıbiri kásipterin damytýǵa qarjylyq qoldaý alǵan. Jalpy, 2015 jyldyń 13 naý­ry­zy men 11 qyrkúıegi kúnderi «Nur Otan» partııasynyń barlyq qoǵamdyq qabyldaý bólmelerinde «Bıznestiń jol kartasy-2020» baǵdarlamasyn júzege asyrýǵa múddeli jáne qamtamasyz etetin memlekettik organdar men damý ıns­tıtýttary úshin alań usynylyp, «Myqty bıznes – qýatty memleket» jobasy aıasynda memlekettik qoldaýdy berý máselelerimen aza­mattardy biryńǵaı qabyldaý kúni» respýblıkalyq aksııasyna 5 myńnan astam adamnyń qatysýyna jaǵdaı jasalǵan. Bul rette, qabyldaý barysynda azamattarǵa shaǵyn jáne orta bıznesti qarjylandyrý qol­­jetimdigin arttyrý, kepil­demelerdi usyna otyryp, óz isin jańa bastap júrgenderge qoldaý kórsetý men kepildi qarjylandyrý jaıy jan-jaqty túsindirilip otyrǵanyn aıta ketken jón. Ne­gizinen, mundaı qabyldaýlar «Bıznestiń jol kartasy-2020» baǵdarlamasyna kásipkerlerdiń barynsha qatysýy úshin ońtaıly jaǵdaılar jasaýǵa ózindik úle­sin qosyp keledi. О́ıtkeni, ká­sipkerlerge «О́z isińdi qalaı bastaý kerek» atty oqý kýrstarynan ótý jáne sertıfıkat alý sharttary jáne bıznes josparlardy qalaı qurý kerektigi týraly jan-jaqty aqparattar berilgen. «Nur Otan» respýblıkalyq qoǵamdyq qabyldaý bólmesi meń­gerýshisiniń orynbasary Ju­ma­jan Júkenov qazir óz isin bas­taımyn degen azamattarǵa barynsha jaǵdaılar jasalǵanyn aıtty. «Búgingi tańda Elbasynyń shaǵyn jáne orta kásipkerlerdi qoldaý týraly tapsyrmasyna sáıkes, arnaıy baǵdarlama da bar. Sol baǵdarlama baǵyttaryn kásipkerlerge jan-jaqty jet­kizý úshin osyndaı is-sharalar ótkizýdemiz. Eger biz jetkizbesek, onda olar qaıdan biledi. Partııa qabyldaý bólmelerine kelip jat­qandyǵy da sondyqtan», dedi Jumajan Qamkenuly. Orta jáne shaǵyn kásipkerler memleket tarapynan qarjylaı qoldaýlarǵa ıe bolyp, óz isterin dóńgeletip áketýde belsendilik tanytyp kele jatqandyǵy da ataldy. Onyń ústine, qoldaýǵa qatysty jáne ártúrli ákimshilik kedergilerdi alyp tastaýda kóptegen jańa­shyl­­­dyq­tar kórinis taýyp, baǵ­dar­lamalar da jetildirilip keledi eken. Búginde memleket lızıngtik jolmen qarjylandyrý máselesin sheship otyr. Qazirdiń ózinde kásibin bastaımyn degen azamattarǵa 20 mıllıon teńgege deıin nesıe alýǵa múmkindik berilipti. Byltyr keıbir jerlerde kepildik máselesi kúrdeli bolyp kelse, endi «Damý» qory sol táýekelderdiń keıbirin óz moıyndaryna al­ǵany málim boldy. Alaıda, ká­sip­kerlerdiń basyndaǵy problemalar áli de tolyq sheshil­meýde. «Iýpıter» zertteý ortalyǵy» JShS bas dırektory Bolathan Boranbaev qabyldaý bólmesine «Damý» qorynyń qalalyq fılıalyna shaǵymdana kelgendigimen túsindirdi. Onyń aıtýynsha, jarty jylǵa jýyq ýaqyt ishinde qarjyǵa áreń degende qol jetkizgen. Son­dyqtan da ol joǵaryda atalǵan qordyń qalalyq fılıalynyń jınaqtaıtyn qaǵazdary ekinshi dárejeli bank­­­terden de kóptigin aıtyp, tıimsizdigine qaraı qys­qartyp tas­taýdy usyndy. «Damý» Kásipkerlikti damytý qory» AQ-tyń Astana qa­lasyndaǵy aımaqtyq fılıaly dırektorynyń orynbasary Sáýle Ábishevanyń túsindirýinshe, zańnamaǵa engizilgen ózgeristerge sáıkes, ótken jyldyń naýryzynda aınalymy 60 mıllıon teńge bolatyn ınvestısııalyq jobalarǵa beriletin kepildendirý jaıyn zańnamaǵa sáıkestendirý qarastyrylypty. Bank ombýdsmeni Erserik Sıyrbaev óz kezeginde máseleniń mánisine úńile kelip, «Damý» qory tarapynan beriletin nesıe bank júıesimen úılestirile júzege asyrylyp, kemshilikter azaıatynyna senim bildirdi. Deı turǵanmen, ol bank pen nesıe alý­shy tarapynan bolýy múmkin táýekeldermen bólisý jaıyn da tilge tıek ete ketti. Al osydan bir jyl buryn teledıdardan osyndaı qabyldaýlar júrip jatqandyǵyn estigen Qazaq tehnologııa jáne bıznes ýnıversıtetiniń 3-shi kýrs stýdenti Mádına Farhatova óz isin bastaý úshin osynda aqyl-keńes alýǵa arnaıy kelipti. Mine, osyndaı óz isin bas­taý úshin kelgen azamat­tarǵa qoǵamdyq bólmelerdegi qabyldaýlar tıisti keńester men usynystar berip qana qoımaı, onyń naqty sheshimin de usynady. Osy turǵydan kelgende, shaǵyn jáne orta bıznes ókilderiniń túıtkildi máselelerin sheshýde partııa qabyldaý bólme­leriniń alar orny alabóten. Asqar TURAPBAIULY, «Egemen Qazaqstan».