Daıyndyq barysy pysyqtaldy

«Birlik» partııasy úgit-nasıhat naýqanyna daıyn. Bul týraly keshe «Birlik» saıası partııasynyń basshylyǵynyń qatysýymen BAQ ókilderine arnalǵan partııanyń Ortalyq saılaýaldy shtabyndaǵy brıfıngte aıtyldy. Jýrnalısterdiń suraqtaryna jaýap bergen «Birlik» partııasy tóraǵasynyń orynbasarlary Bolat Baıqadamov pen Tólegen Qýanyshev, partııa músheleri Murat Raev, Murat Qojamqulov óz sózderinde qazirgi kezde «Birlik» partııasy saılaýaldy naýqanǵa tolyq daıyn ekendigin, partııanyń saılaý shtabtary elimizdiń barlyq óńirinde jumys jasap otyrǵanyn jetkizdi. Olardyń aıtýynsha, partııanyń Ortalyq saılaý shtaby resmı túrde bıylǵy jyldyń 12 aqpanynda Astana qalasynda ashylǵan, barlyq ofıs qajetti tehnıkamen jáne avtokólikpen tolyqtaı qamtamasyz etilgen. Buǵan qosa, saılaýaldy baǵdarlama da ázirlenip, qabyldanǵan, úgit únparaqtarynyń, plakattar men basqa atrıbýttardyń syzbalary bekitilgen. Máselen, «Birlik» partııasy tóraǵasynyń orynbasary T.Qýanyshev partııanyń bılbordtar daıarlaý jáne ornalastyrý jónindegi jarnamalyq kompanııalarmen shart jasasqanyna, partııanyń iske qosylǵan resmı saıty pp-birlik.kz. arqyly atqarylǵan jáne aldaǵy ýaqytta atqarylatyn jumystar boıynsha egjeı-tegjeıli tolyq aqparat alýǵa bolatynyna toqtalyp ótti. Jalpy, depýtattyqqa kandıdattar úshin úsh ádistemelik usynym daıyndalsa, onyń bireýi senimdi ýákildermen jumys jónindegi nusqaýlyq, endi bireýi saılaý ótkizýdi uıymdastyrý máseleleri boıynsha ázirlengen jadynama eken. Bıylǵy jyldyń 20 qańtarynan qazirgi kezge deıin partııa Astana men Almaty qalalarynda 84 is-shara ótkizgen, onyń ishinde partııanyń kezekten tys II sezi de bar. Al eldiń qalǵan óńirlerinde 194 is-shara uıymdastyrylypty. Partııa ókilderi búgingi kúni «Birlik» partııasynyń Astana qalasyndaǵy Ortalyq shtabyna 38 adam kelgenin, Almaty qalasyndaǵy shtabyna 12 adam, jalpy fılıaldar boıynsha 122 adam kelgenin jetkizdi. Olardyń barlyǵy partııanyń jumys isteý qaǵıdattary, maqsaty, partııa tizimi boıynsha depýtattyqqa usynylǵan kandıdattar týraly tolyq, túbegeıli aqparat alǵan kórinedi. Sonymen qatar, ujymdyq ótinimder men jekelegen saılaýshylar tarapynan ótinishter qabyldansa, olardyń arasynda «Samal» shaǵyn aýdanyndaǵy lıftilerdiń jumysyna, «Ońtústik-Shyǵys» shaǵyn aýdanynda qar jınaýǵa qatysty máseleler de bar eken. О́z kezeginde «Birlik» partııasynyń ókilderi barlyq ótinishti shuǵyl tártipte qarap, tıisti ýákiletti organdarmen baılanysyp, máselelerdi qysqa merzimde sheshý týraly ýaǵdalastyqqa qol jetkizgen. Partııa, sonymen qatar, saılaý zańnamalaryn túsindirý maqsatynda Parlament Májilisiniń depýtattyǵyna kandıdattarǵa jadnama daıyndap, úgit-nasıhat rolıkteri men maqalalaryn ornalastyrý úshin BAQ-tarmen shart jasasýda kórinedi. Láıla EDILQYZY, «Egemen Qazaqstan».