Saılaýǵa koalısııa retinde qatysýda

Keshe Jalpyulttyq sosıal-demokratııalyq partııanyń Parlament Májilisi depýtattyǵyna úmitkerleri «Biz nege saılaýǵa barýǵa tıistimiz?» taqyrybynda azamattyq tyńdaý ótkizdi. Partııanyń saılaýaldy shtabynyń tóraǵasy Ashat Rahymjanov óz sózinde kún tártibinde eki másele bar ekendigin, basqosýdy ekinshi máseleden bastaýdy jón kórip otyrǵandyǵyn jetkizdi. Biz saılaýǵa qatysýshy kez kelgen saıası partııamen pikirsaıysqa túsýge ázir ekendigimizdi málimdeımiz, dedi Ashat Nurmaǵambetuly. Májilis depýtattyǵynan úmitker Ýálıhan Qaısarov saılaý kezinde saıa­sı partııalardyń tuǵyrnamalary jurtshylyqtyń qyzyǵýshylyǵyn týdyratynyn aıtty. Bılikke umtylǵan saıası partııalardyń baǵdarlamasynan habardar bolý zańdylyq. Qazaqstandyqtardyń bul jaǵynan belsendiligi joǵary. Ashyq pikirtalastyń bolýy buqaranyń da yqylasyn týdyrady. Sondyqtan biz kez kelgen túrdegi, kez kelgen taqyrypqa oraı pikirtalasqa daıynbyz, dedi ol. Odan ári qaraı sheshender azamat­tyq tyńdaýdyń kún tártibindegi birin­shi másele – «Biz nege saılaýǵa barý­ǵa tıis­timiz?» degen taqyryp aıasyn­daǵy áń­gimege oıysty. Májilis depý­tat­tyǵynan úmitker Jankeldi Shymshyqov: «Bizdiń partııa saılaýǵa jeke óziniń mú­she­leri arqyly ǵana qatysyp otyrǵan joq. Ulttyq azamattyq jınalyspen koa­lı­sııa retinde, ıaǵnı «Jeltoqsan» qory, «Parlamentarızm» qory, «Semeı polı­gon» qory, qysqasy, 10 azamattyq birles­tikpen birge koalısııa retinde qatysý­da. Jalpyulttyq sosıal-demo­kra­tııa­lyq partııa osylaısha azamattyq qoǵamdy qalyptastyratyn úkimettik emes uıymdardy óz partııalyq tizimi qataryna qosyp, aýqymdy iske bastamashy boldy», dedi. J.Shymshyqov odan ári qaraı eko­­no­mıkalyq daǵdarysqa qatysty óz tujy­­rymdaryn ortaǵa saldy. Búkil­álemdik banktiń boljamdaryna súıene otyryp, 2016 jyldyń ekonomıkalyq ahýa­lyna toqtaldy. Álemdegi ekono­mıkalyq ósim ortasha alǵanda 3 paıyz­dyń tóńireginde bolady dep boljanyp otyr. Al Úndistan, Qytaı, Eýropa elder­indegi ekonomıkalyq ósimniń baıaý­laǵany da belgili. Kórshimiz Reseıde ekonomıkalyq kórsetkish tómendeıtinin jetkizdi. Ýkraı­nanyń da jaǵdaıy máz emes, meshin jyly, Álemdik banktiń bol­jamyna qaraǵanda, Qazaqstan eko­nomı­kasy úshin de jaıly jyl bolmaı­tyn túri bar. Ulybrıtanııanyń, AQSh-tyń bedeldi sarapshylarynyń pikiri­ne qaraǵanda, 1998 jyldan keıin al­ǵash ret Qazaqstan ekonomıkasynyń ósimi tó­mendeıtin kórinedi. Sóziniń sońynda ol qalyptasqan ekonomıkalyq daǵdarysqa baılanysty el úkimeti naqty sharalar qabyldaý qajettigine nazar aýdardy. Ǵabıt ISKENDERULY, «Egemen Qazaqstan». Sýretti túsirgen Erlan OMAROV.