PAVLODAR. 25 aqpan. Pavlodarlyq jas órender Almatyda ótken mektep oqýshylary arasyndaǵy respýblıkalyq ǵylymı jobalar saıysynda 25 medal aldy. Bul týraly oblystyq bilim basqarmasynyń málimetine silteme jasaǵan egemen.kz tilshisi habarlady.
Bilim jarysyna elimizdiń ár jerinen 700-den astam oqýshy qatysty. Al Pavlodar oblysynyń namysyn 65 oqýshy qorǵady. Tórt baǵyt boıynsha ótken saıysta komandalyq 1-orynǵa Astana, Almaty qalalary men Pavlodar jáne Shyǵys Qazaqstan oblystary ıe boldy.
Bizdiń oqýshylar bul joly 4 – altyn, 5 – kúmis jáne 16 qola medalge qol jetkizdi. Birinshi oryndy oblys ortalyǵyndaǵy daryndy balalarǵa arnalǵan №3 gımnazııa oqýshylary Dáýren Qarambaev, Danııal Táshenov, Ekibastuzdaǵy №1 mektep-lıseıdiń oqýshylary Kamıla Qýanysheva, Daıana Semykına ıelendi. Sondaı-aq, 6 ǵylymı joba avtorlary respýblıkalyq «Daryn» ǵylymı-praktıkalyq ortalyǵynyń Alǵys hattarymen marapattaldy. «Eń úzdik ǵylymı joba» atalymyn jáne Intel ISEF belgisin oblys ortalyǵyndaǵy daryndy balalarǵa arnalǵan №3 gımnazııanyń oqýshylary Dáýren Qarambaev pen Danııal Táshenov aldy.
Farıda Byqaı.
Derek, sýret: Pavlodar oblystyq bilim basqarmasy.
