ASTANA. 25 aqpan. Dúnıejúzilik áýesqoı boks qaýymdastyǵy (AIBA) kásipqoı boksshylardyń Olımpıada oıyndaryna qatysý máselesine baılanysty sheshim qabyldady. Endi 12 raýnd boıy sharshy alańda sharshamaı aıqasýǵa múmkindigi bar kásipqoılar Olımpıada júldesine de talasýǵa quqyly. Bul týraly ESPN-ge silteme jasaǵan egemen.kz tilshisi habarlady.
AIBA prezıdenti Chıng-Kýo Vý myrzanyń aıtýynsha, jetekshi kásipqoı boksshylar Olımpıalyq oıyndarǵa qatysý quqyna ıe boldy. Mundaı sheshim atalǵan uıymnyń keshe Anglııanyń Manchester qalasynda ótken kezekti jıynynda qabyldandy.
Eń qyzyǵy, kásipqoı boksshylar bıyl ótetin Rıo Olımpıadasynan bastap qatysýǵa múmkindik alyp otyr. Aldaǵy birneshe aıdyń ishinde osy máselege kedergi bolyp otyrǵan basqa da tetikter qarastyrylyp, barlyq keleńsizdik tolyǵymen joıylmaq.
Aıta keteıik, 2013 jyly AIBA kásipqoı boksshylarǵa Olımpıadaǵa qatysýǵa ruqsat bergen edi. Alaıda, ol kezde «boksshy kásipqoı deńgeıde 15 jekpe-jekten artyq ótkizbeý kerek», degen talap qoıyldy. Sondaı-aq, Oıyndarǵa qatysýǵa nıetti kásipqoı boksshy AIBA-nyń kásipqoı boks boıynsha bólimi APB-men qysqa merzimdi shartqa qol qoıýy tıis-tin. Endi bul kedergilerdiń barlyǵy alynyp tastalatyn boldy.
Al 2013 jylǵa deıin kásipqoı boksshylarǵa Olımpıadaǵa qatysýǵa eshqandaı múmkindik berilgen joq.
Elaman Qońyr.
Derek, sýret: ESPN.
