ASTANA. 17 naýryz. Astanada alǵash ret Qazaqstan Respýblıkasy Ulttyq Olımpıadalyq komıtetiniń kezekten tys sezi ótti. Bul týraly egemen.kz tilshisi habarlady.
Jıynda komıtettiń jańa jarǵysy bekitilip, jańa músheleri taǵaıyndaldy. UOK prezıdenti Tımýr Qulybaevtyń jetekshiligimen ótken jıynǵa Mádenıet jáne sport mınıstri Arystanbek Muhamedıuly, ulttyq sporttyq federasııalardyń jetekshileri, tanymal sportshylar qatysty. Alqaly jıynnyń mańyzdylyǵy týraly Olımpıada chempıony Jaqsylyq Úshkempirov óz oıymen bólisti.
«Alqaly jıyn óte jaqsy ótti. Elimizdiń Ulttyq Olımpıadalyq komıteti halyqaralyq talaptarǵa saı bolý úshin uıymnyń jańa jarǵysyn qabyldady. Árıne, Halyqaralyq Olımpıadalyq komıtettiń suranys-talabyna barlyq jaǵynan saı bolýymyz kerek», dedi Jaqsylyq Úshkempirov.
Sezd barysynda sportshylar komıssııasynyń quramy bekitildi. Tuńǵysh ret jasaqtalǵan komıssııaǵa mánerlep syrǵanaýshy Denıs Ten, ziltemirshi Ilıa Ilın, palýan Gıýzel Manıýrova, taekvondoshy Arman Chılmanov kirdi. Al, boksshy, Olımpıada chempıony Serik Sápıev osy komısssııanyń tóraǵasy bolyp saılandy.
Dastan Kenjalın.
Derek: egemen.kz
Sýret: Mádenıet jáne sport mınıstrligi Sport jáne deneshynyqtyrý isteri komıteti, Sporttyq jekpe-jek jáne kúsh qoldanylatyn sport túrleri konfederasııasy.
