Qyzylordada izdeýde júrgen 7 qylmysker ustaldy

QYZYLORDA. 17 naýryz. Aımaqtaǵy krımınogendik ahýaldy seıiltý, quqyq tártibi men jol qozǵalysy  qaýipsizdigin qamtamasyz etý, kósheler men basqa da qoǵamdyq oryndarda qylmystardy eskertý jáne jolyn kesý baǵytynda oblys kóleminde «Quqyq tártibi» jedel-profılaktıkalyq is-sharasy ótip jatyr. Osy shara barysynda izdeýde júrgen jeti qylmysker ustaldy. Bul týraly oblystyq ishki ister departamentine silteme jasaǵan .egemen.kz tilshisi habarlady. Is-sharanyń 1 kúninde ár túrli quqyq buzýshylyqtar jasaǵan 862 azamatqa ákimshilik shara kórildi. Onyń ishinde belgilengen júrý jyldamdyǵyn arttyrǵany úshin – 78, kólik quralyn basqarý kezinde telefondy nemese radıostansııany paıdalanǵany úshin – 121, qaýipsizdik beldigin taqpaǵany úshin – 170 azamatqa qatysty ákimshilik hattamalar toltyrylyp, kólik quralyn mas kúıinde basqarǵany úshin 10 azamat narkologııalyq saraptamadan ótkizilip, tıisti sheshim qabyldaý úshin jınaqtalǵan qujattar sotqa joldandy. Táýlik ishinde 16 qylmystyń beti ashylyp, onyń 8-i – izi sýymaı ashyldy. Izdeýde júrgen 7 qylmysker ustaldy. Esirtki zatyn saqtaǵany úshin 30 jastaǵy qala turǵynynan 44,22 gramm «keptirilgen marıhýana» tárkilendi. Jalpy, oblys kóleminde jol qozǵalysy qaýipsizdigin qamtamasyz etýge baǵyttalǵan «Quqyq tártibi» arnaıy jedel-profılaktıkalyq is-sharasy naýryz aıynyń 18-ne deıin jalǵasatyn bolady. Erjan Baıtiles. Derek, sýret: egemen.kz