Qazaqtyń batyr uly – Maǵjan elinde

Qasıetti Qyzyljar jerine alǵash ret taban tiregen qazaqtyń batyr uly Aıdyn Aıymbetovke oblys jurtshylyǵy úlken iltıpat kórsetip, gúl shoqtarymen qarsy aldy. Esimi tarıhymyzǵa altyn áriptermen jazylǵan ǵaryshker-ushqyshtyń alǵashqy sapary ǵaryshker jerlesimiz Vladımır Shatalovtyń eskertkishine gúl shoqtaryn qoıýdan bastalyp, odan keıin «Jas ulan» balalar-jasóspirimder uıymynyń múshe­lerimen kezdesti. Halyq Qaharmany «Zen­chenko jáne K» komandıttik serik­testiginde bolyp, otandyq ónimderdiń sapalyq quramyna nazar aýdardy. Ujymmen kezdesýde ozyq tehnologııalardy qoldaný arqyly kúnine 40 tonna tabıǵı sútti qaldyqsyz óńdeıtin kásiporynnyń jumysyn joǵary baǵalap, tabys tiledi. Jınalǵandarǵa ǵarysh jaıly qyzyqty áńgimeler shertip, qazaqtyń jeńsik tamaǵy – qurt ala barǵanyn aıtýdy da umytpady. Oblystyq Qazaqstan halqy Assambleıasy úıinde etnomádenı birlestikter ókilderimen ótken basqosýda «Máńgilik El» ıdeıasy, halyqtar arasyndaǵy dos­tyq, jas­tar tárbıesi, Táýel­sizdigimizdiń 25 jyldyǵyna oraı atqarylyp jatqan patrıottyq sharalar men bastamalar negizgi taqy­ryp arqaýyna aınaldy. Qa­zaq­stan Respýblıkasy Ás­ke­rı-áýe qyzmetiniń polkov­nıgi Aıdyn Aqanuly soltústik­qazaqstandyqtardy Ulystyń Uly kúni – áz Naýryz mere­kesimen quttyqtap, beıbit ómir, tatý-tát­ti birlik tiledi. Ǵaryshta bol­ǵan onkúndik saparyna qatysty qoıylǵan saýaldarǵa jaýap qaıtaryp, ǵarysh salasyn da­mytýǵa memleket tarapynan udaıy kóńil bólinip kele jat­qanyn jetkizdi. Agrarshylarmen, sportshylarmen, stýdent jastarmen ótken kezdesýler de taǵylymǵa toly boldy. О́mir ESQALI, «Egemen Qazaqstan». Soltústik Qazaqstan oblysy.