«Demokratııa ınstıtýty» ǵylymı-zertteý assosıasııasy Exit-poll tehnologııasy boıynsha saılaý ýchaskelerinen shyqqan sátte saılaýshylar arasynda respýblıkalyq saýaldama júrgizdi. Exit-poll-dyń qorytyndylary mynadaı: «Nur Otan» partııasy – 82%, «Qazaqstannyń Kommýnıstik halyq partııasy» – 7,17%, «Aq jol» partııasy – 7,22%, «Birlik» partııasy – 0,35%, Jalpyulttyq sosıalıstik-demokratııalyq partııa – 1,21%, «Aýyl» partııasy – 2,05%.
Keshe Memleket basshysy Nursultan Nazarbaev Parlament Májilisi jáne máslıhattar
depýtattarynyń saılaýlarynda halyqpen birge daýys berdi.
Qazaqstan Prezıdenti elordadaǵy Oqýshylar saraıynda ornalasqan № 81 saılaý ýchaskesine kelip, óz tańdaýyn jasady. Elbasy daýys berip bolǵan soń, otandyq jáne sheteldik BAQ ókilderiniń aldynda óz pikirin bildirdi. О́z sózinde Memleket basshysy saılaýǵa qatysý arqyly mıllıondaǵan qazaqstandyqtar sııaqty óziniń konstıtýsııalyq quqyǵy men azamattyq boryshyn júzege asyrǵanyn atap ótti. – Májilis jáne jergilikti ókildi bılik organdarynyń búgingi saılaýy – Qazaqstannyń qazirgi zaman tarıhyndaǵy óte mańyzdy kezeń. Qazaqstanda jáne álem boıynsha eldiń 9 mıllıonnan astam azamaty 9900-deı saılaý ýchaskesinde daýys beredi. Kezekten tys saılaý qazir ómirimizdiń barlyq salasynda jańarý júrip jatqanyn sezingen el Parlamentiniń bastamasymen ótkizilip otyr. Biz daǵdarys úrdisterin eńseremiz, bul úshin daıyndyǵy bar jáne isti biletin jańa depýtattar qajet, – dedi Qazaqstan Prezıdenti. Nursultan Nazarbaev el azamattarynyń saılaýdaǵy belsendiligin de óz sózine arqaý etti. – Búgin ertemen qazaqstandyqtar otbasylarymen, balalarymen ýchaskelerge kelip, daýys berýge belsene qatysýda. Bul azamattarymyzdyń bılikke, sonyń ishinde zań shyǵarýshy bılikke degen senimin bildiredi. Biz búgin elimizge qajetti Parlamentti saılaıtynymyzǵa senimdimin, – dedi Memleket basshysy. Qazaqstan Prezıdenti otandyq jáne sheteldik BAQ-tarǵa arnalǵan brıfıngte birqatar saýaldarǵa jaýap berdi. Máselen, Memleket basshysy atqarýshy organdardyń ókildi bılik aldyndaǵy eseptiligin júzege asyrý tetikteri týraly aıtty. – Zańnamaǵa sáıkes, Úkimettiń jumysyn, sonyń ishinde bıýdjet qarajatynyń shyǵystaryn baqylaý úshin Parlamenttiń barlyq ókilettigi bar. Sondaı-aq, zań qabyldanǵannan keıin Parlament sol normalardyń iske asyrylýyn qadaǵalaýy tıis, – dedi Nursultan Nazarbaev. Qazaqstan Prezıdenti saıası júıeniń yqtımal ózgerisi el Konstıtýsııasymen tikeleı baılanysty bolatynyn aıtty. – Negizgi zańdy referendýmda halyq qabyldady, qajet jaǵdaıda ózgeristi de halyq qabyldaıdy. Áńgime bılikti Prezıdent, Parlament jáne Úkimet arasynda bólýge baılanysty bolýy múmkin. Bul ózgerister álemdegi jáne eldegi ahýalǵa baılanysty bolady. Halyq qalasa, biz muny jaqsylap oılanatyn bolamyz, – dedi Nursultan Nazarbaev. Memleket basshysy atqarýshy bılikte bolýy múmkin ózgeris týraly da oıyn bildirdi. – Úkimettiń byltyr Prezıdent saılaýynan keıin ózgergenin eske salǵym keledi. Onyń qazirgi quramy daǵdarysqa qarsy baǵdarlamalardy jáne bes ınstıtýttyq reformany júzege asyrý jónindegi zańdardy ázirledi, qazir sol boıynsha jumystar júrip jatyr. Úkimettiń quramy saýatty iriktelgen dep sanaımyn. Onda bilimdi, jas, shetel tilderin meńgergen óz isiniń bilgirleri jumys isteıdi. Bastaǵan jumysyn olarǵa sońyna deıin jetkizýge múmkindik berý kerek dep oılaımyn, – dedi Qazaqstan Prezıdenti. Joldybaı BAZAR, «Egemen Qazaqstan». Sýretterdi túsirgender S.BONDARENKO, B.OTARBAEV.
