Qazaqstan – ortaq úıimiz!

Táýelsizdiktiń 25 jyldyǵyn tý etip, shalǵaıdaǵy eldi mekenderdi bir aıdan astam júrip ótken «Máńgilik El» poıyzy naýryzdyń 18-i kúni Almatynyń 2-shi temirjol beketine kelip toqtaǵanyn buǵan deıin habarlaǵan bolatynbyz. Jalpyulttyq «Máńgilik El» áleýmettik bastamasy jarshylarynyń qataryndaǵy eń úzdik dárigerlerden jasaqtalǵan top poıyzdan túse salysymen Almatynyń Alǵabas shaǵyn aýdanynda ornalasqan №29 emhanaǵa jol tartty. Almaty qalalyq densaýlyq saqtaý basqarmasynyń basshysy Ýálıhan Ahmetov elimizdiń medısına salasynyń eń úzdik dárigerlerin qarsy alyp, olardyń jumysyna sáttilik tiledi. Áriptesterimizdi «Máńgilik El» poıyzymen úlken qaıyrymdylyq sharasyn atqaryp kelgen qyzmetimen quttyqtaımyz, dedi shahardyń bas dárigeri. Densaýlyq saqtaý basqarmasy qalaǵa Almaty oblysynan jańadan qosylǵan aýdan­darda mekendeıtin turǵyn­dardyń densaýlyǵyn árdaıym nazarda ustaıdy. Biz bul joly kásibı mamandar úshin Alǵabas shaǵyn aýdanyndaǵy byltyr paıdalanýǵa berilgen №29 emhanany arnaıy tańdadyq. Búgin bizdiń turǵyndarǵa áleýmettik poıyzdyń mamandary men qalanyń ózge medısınalyq uıymdary jáne respýblıkalyq ǵylymı-zertteý ınstıtýttary, Ulttyq ortalyqtardyń tájirıbeli mamandary medısınalyq kómek kórsetedi. Dárigerlerimiz 9-10 shaqty emhananyń naýqastaryna aldyn ala zertteý júrgizip, olar bilikti kásibı mamandardan keńes alýǵa keldi. Osylaısha, «Máńgilik El» áleýmettik poıyzynyń dárigerlerinen 70-ten astam almatylyq medısınalyq keńes aldy. Ásirese, kardıolog, oftalmolog, endokrınolog jáne nefrolog qyzmetine júgingender kóp boldy. – Bul ıgi shara Densaýlyq saqtaý jáne áleýmettik damý mınıstrliginiń bastamasymen elimizge engizilgen joǵary tehnologııalyq mamandandyrylǵan medısınalyq kómekterdi tek úlken qalalarda ǵana emes, shoǵyrlanǵan shalǵaı eldi mekenderdegi qazaqstandyqtarǵa qoljetimdiligin arttyrý maqsatynda júrgizildi, – dedi Densaýlyq saqtaý jáne áleýmettik damý mınıstrliginiń stasıonarlyq kómekti uıymdastyrý basqarmasynyń basshysy N.Qydyrbaev. – Shara barysynda mamandar kómek surap kelgen naýqastardyń barlyǵyn kórip, olardyń arasynan jedel medısınalyq kómekti qajet etetin 400-den astam naýqasqa Astana jáne Almatydaǵy ǵylymı ortalyqtarynda emdelýge joldama berdi. Bul iste ári qaraı bekitilgen dárigerler naýqastarǵa joldama berýdi jalǵastyrady. Sóıtip, olar joǵary mamandandyrylǵan ǵylymı ortalyqtarda emdelýge múmkindik almaq. 2011-2015 jyldary «Salamatty Qazaqstan» memlekettik baǵdarlamasy aıasynda elimizdiń densaýlyq saqtaý nysandaryna kóptegen tehnologııalar keldi. Budan 10-11 jyl buryn júrek transplantasııasy sırek bolsa, osyndaı baǵdarlamalar men memlekettik saıasattyń arqasynda biz úlken jetistikterge qol jetkizip otyrmyz. Búginde barlyq oblys ortalyqtarynda júrek, baýyr, búırekke operasııa jasalady. Bul «Salamatty Qazaqstan» baǵdarlamasynyń qısyndy jalǵasy bolyp tabylady. Aldyńǵy baǵdarlamada joǵary tehnologııalar engizilse, kelesi baǵdarlama saqtandyrý medısınasy, alǵashqy medısınalyq kómekti damytý, aýrýdyń aldyn alýǵa baýlý, árkimniń óz densaýlyǵyna jaýapkershilikpen qaraýǵa úıretedi. Gúlzeınep SÁDIRQYZY, «Egemen Qazaqstan». ALMATY.