Bótensiń dep bólektemeıtin el

Qazaqstan halqy As­sambleıasy – elimizdegi máńgi dostyqtyń kepili. Biz ata-babalarymyz basynan keshirgen qasiretti umytqan joqpyz. Stalındik repressııa, basqa da qýǵynǵa ushyraǵan halyqtar sııaqty koreı halqyna da ońaı tıgen joq. Qabyrǵalary shuryq­tesik ajal vagondarymen Qıyr Shyǵystan Qazaqstanǵa jetkenshe ashtyqtan, sýyqtan júzdegen baýyrlarymyz jaryq dúnıemen qoshtasyp jatty. Olardy eshkim jerlegen de joq, óli deneleri vagonnan laqtyrylyp, ıt pen qusqa jem boldy. Biz munshalyq qasiretti ata-analarymyzdan estip óstik. Ol kezde olar oıyn balasy bolsa da osynyń bárin júreginen ótkizdi, erte eseıdi. Atap kórsetetin jaıt, aryp-ashqan, ashtyq pen aýrýdan isinip kepken babalarymyz ben sheshelerimiz taıanyshty qazaq halqynan tapty. Týmysynan aqkóńil, baýyrmal qazaq «bótensiń» dep irgesin bólektegen joq. О́z úıinen jaı berdi, jep otyrǵan tamaǵynyń jartysymen bólisti. Qazaq halqynyń baýyrmaldyǵyn ata-babalarymyz osylaı rızalyqpen aıtyp otyratyn. Bizdiń búgingi tiri júrgenimizge sebepker qazaq jurty bolǵandyqtan, qalaı alǵys aıtpassyń?! Bul – Qazaqstanǵa zorlap kóshirilgen barsha ulttar men ulystar áýletiniń basynan ótken taǵdyr. Jaqynda ońtústiktegi túrli etnomádenı birlestikterdiń jetekshileri, ókilderi bas qosyp, jıyn ótkizdik. Májiliske OQO apparaty basshysynyń orynbasary – Assambleıa hatshylyǵynyń meńgerýshisi Muratáli Qalmuratov qatysyp, oı-josparymen bólisti. Bárimiz keńesip, «Qazaq halqyna myń alǵys» monýmentin ornatýǵa sheshim qabyldadyq. Biz – Qazaqstannyń bir bólshegimiz. Basqa Otanymyz joq. Elbasymyzdyń sara saıasatyn júzege asyrý jolynda bolashaǵymyz birtutas Máńgilik Elge aınalýǵa kúsh-qýatymyz jetedi. О́ıtkeni, bizdi qatal taǵdyr Qazaq elimen aǵaıyn etip tabystyrǵan. Roza PAK, koreı etnomádenı birlestiginiń tóraıymy.   Ońtústik Qazaqstan oblysy.