Keshe elordadaǵy Ulttyq akademııalyq kitaphanada Memlekettik hatshy Gúlshara Ábdiqalyqovanyń tóraıymdyǵymen Qazaqstan Respýblıkasy Táýelsizdiginiń 25 jyldyǵyn ótkizý boıynsha Memlekettik komıssııasynyń birinshi otyrysy ótti.
Atalǵan komıssııa Qazaqstan Prezıdentiniń bıylǵy jylǵy 28 naýryzdaǵy Jarlyǵymen Táýelsizdiktiń 25 jyldyǵyn merekeleýdi joǵary ıdeologııalyq jáne uıymdastyrýshylyq deńgeıde ótkizý maqsatynda qurylǵan edi. Sondyqtan, komıssııanyń alǵashqy otyrysynda Táýelsizdiktiń 25 jyldyǵyn merekeleý sheńberinde uıymdastyrylatyn is-sharalardy daıyndaý men ótkizýdiń negizgi máseleleri talqylandy.
Otyrysty ashqan Gúlshara Ábdiqalyqova Qazaqstan Táýelsizdiginiń 25 jyldyǵyn atap ótý, mereıli jyldy laıyqty qarsy alý eldigimizge úlken syn ekenin aıtty. «Elbasy Qazaqstan Táýelsizdiginiń 25 jyldyǵyn merekeleý týraly Jarlyqqa qol qoıdy. Arnaıy Memlekettik komıssııa qurylyp, ol týraly ereje men komıssııanyń derbes quramy bekitildi. Búgin komıssııa músheleri tolyqtaı jınalyp otyr. Jyldy «Birlik pen jasampazdyqtyń 25 jyly» uranymen merekeleý týraly tujyrymdama qabyldandy. Qasterli Táýelsizdigimizdiń shırek ǵasyrlyq mereıtoıy el tarıhyndaǵy betburysty kezeń bolmaq. Ol elimizdi túbegeıli jańǵyrtatyn 5 ınstıtýttyq reformany qarqyndy júzege asyrý kezeńine sáıkes keldi. Sonymen birge, álemdik daǵdarystyń saldary sezilip turǵan kúrdeli ýaqytqa tuspa-tus kelip otyr. Degenmen, Elbasy atap ótkendeı, Qazaqstannyń 25 jylda jetken jetistikteri qandaı daǵdarystan da salmaqtyraq. Mereıli jyl elimizdiń Táýelsizdigi men memlekettiligin odan ári nyǵaıtyp, halyqty rýhanı-mádenı biriktire túsýi, sabaqtastyq pen progressıvti damýdy qamtamasyz etýi tıis. Qasıetti Táýelsizdigimizdiń arqasynda elimizdiń jetken jetistikterin árbir azamattyń sezinýi aıryqsha mańyzdy. Elbasynyń sarabdal saıasatymen elimiz Táýelsizdik jyldarynda barlyq sala boıynsha tabysty reformalar júrgizdi. Eń qarqyndy damýshy elderdiń biri atanyp, álemge syıly ári senimdi memleket retinde tanyldy. Búgingi Qazaqstan ekonomıkasy myǵym, saıası ahýaly turaqty, qoǵamy damyp, tirshiligi jaqsarǵan, áldeqashan qalyptasqan memleket. Beıbitshilik pen kelisimdi nyǵaıtyp, etnosaralyq jáne konfessııaaralyq tatýlyqty saqtaı bilgen el. Bul rette, Táýelsizdik – bizdiń barlyq jetistigimizdiń negizi. Demek, bul azattyǵymyzdyń shırek ǵasyrlyq mereıli jylyn merekeleý barysynda árbir qazaqstandyqtyń júreginen nyq oryn alýy tıis», – dedi.
Budan keıingi kezekte Táýelsizdiktiń 25 jyldyǵyn merekeleýge daıyndyq sharalary týraly Mádenıet jáne sport mınıstri Arystanbek Muhamedıuly sóz aldy. «Táýelsizdik alǵan 25 jyldan bergi ýaqytta Elbasynyń arqasynda búkil álem Qazaq elin, qazaq ultyn barynsha tanydy, mártebeli memleket retinde moıyndady. Biz Táýelsizdiktiń arqasynda irgesi berik, keleshegi kemel memleket qurdyq. Álemdik qaýymdastyqqa demokratııaly-zaıyrly memleket ekenimizdi dáleldedik. Sondyqtan, Elbasynyń halyqqa arnaǵan Joldaýynda kórsetilgen tapsyrmalar men mindetterdi, elimizde iske asyrylyp jatqan reformalardy basshylyqqa ala otyryp, olardy laıyqty júzege asyrýǵa barlyq kúsh-jigerimizdi salatyn bolamyz. Eń bastysy, bıylǵy jyly Táýelsizdiktiń 25 jyldyǵyn búkil halyq bolyp atap ótý sharalaryna jyl basynan beri daıyndyq sharalaryn oıdaǵydaı bastap kettik. Bul – dáýirlik oqıǵa. Halqymyzdyń san urpaǵynyń oryndalǵan armandary men úmitteriniń nátıjesi. 1991 jylǵy 16 jeltoqsanda Qazaqstan Respýblıkasy memlekettik Táýelsizdigi týraly Konstıtýsııalyq Zań qabyldanyp, elimiz tuńǵysh ret álemdik qoǵamdastyq moıyndaǵan memleket mártebesine ıe boldy. Egemen damýdyń 25 jyly ishinde Qazaqstan «2030 Strategııasyn» merziminen buryn iske asyryp, «2050 Strategııasyn», «100 naqty qadam» Ult Josparyn júzege asyra bastady. Búginde álemdik qaýymdastyq Qazaqstandy TMD elderiniń arasynan jańǵyrǵan ózgeristerdiń kóshbasshysy dep biledi», – dedi A. Muhamedıuly.
Investısııalar jáne damý mınıstri Áset Isekeshev Táýelsizdiktiń 25 jyldyǵynda 100-den astam aqparattyq-nasıhattyq sharalardy ótkizý josparda turǵanyn málimdedi. «Bıyl 100-den astam aqparattyq-nasıhat sharalaryn ótkizý josparda bar. Sonymen qatar, jeltoqsan aıynda ataýly jylǵa baılanysty Táýelsizdikke arnalǵan poshta markalary basyp shyǵarylady. Atalǵan jumystar jyl basynan bastaldy. Mysaly, 18 aqpan kúni áleýmettik jelilerde «25 jyl – bir el – bir taǵdyr» atty shara bastaý aldy. Onyń aıasynda birden 30 myńnan astam qoldanýshy óz sýretterin (avatar) ulttyq naqyshpen bezendirgen edi. Qazirgi ýaqytta 102 myń adam áleýmettik jelilerdegi fotosýretterin ulttyq naqyshpen kómkerip úlgerdi», dedi Á.Isekeshev. Onyń aıtýynsha, bul taqyrypqa otandyq BAQ ókilderiniń qyzyǵýshylyǵy da artyp keledi. Mysaly, jyl basynan beri 5 myńnan astam materıal jarııalanǵan.
Sonymen qatar, ol mereıtoıǵa aqparattyq qoldaý kórsetý aıasynda 50-ge tarta respýblıkalyq BAQ-ty tartý kózdelip otyrǵanyn, otandyq kıno men estrada juldyzdaryn da osy iske belsendi qatystyrý josparda turǵanyn jetkizdi. Buǵan qosa, Táýelsizdiktiń 25 jyldyǵyna oraı, memlekettik organdardyń, ulttyq kompanııalardyń, ónerkásip kásiporyndarynyń basshylary jáne mádenıet pen sport ókilderiniń qatysýymen 25 onlaın-konferensııa ótkizilmek. «Aqparattyq-nasıhattyq jumystar áleýmettik jelilerde de júrgiziledi. Qazan aıynda áleýmettik jelilerde bizdiń elimizdiń geografııalyq erekshelikterine arnalǵan «Qazaqstannyń barýǵa turarlyq belgisiz 25 jeri» atty baıqaý ótedi dep kózdelip tur», dedi Á.Isekeshev.
Bul kúni elimizdiń mádenıet jáne qoǵam qaıratkerleri aldaǵy mereıtoıdy abyroımen ótkizý qajettigine basa nazar aýdaryp, qur naýqanshylyqtan ada bolýǵa shaqyrdy. Máselen, senator, qoǵam qaıratkeri Nurlan Orazalın Táýelsizdiktiń 25 jyldyǵy asta-tók emes, sanaǵa jetetindeı, kókirekke qonatyndaı, júrekke jyly tıetindeı etip toılanýy shart ekenin aıtty. «17 mıllıon halqymyz ol meıramdy qalaı toılasa, sonyń syrtynda bizdi qadaǵalap otyrǵan memleketter de ony jete túsinýi tıis», dedi N.Orazalın.
Memleket qaıratkeri, Parlament Májilisiniń depýtaty Qýanysh Sultanovtyń sózi de osy údeden shyqty. Al Bekbolat Tileýhan atalǵan meıram «qur toılaý, qur shalqý bolmaýy qajettigin» jetkizdi. «Eshqandaı eıforııanyń qajeti joq. Bul meıram – Táýelsizdik aldyndaǵy esep. Bul – Táýelsizdiktiń qadirin túsindiretin úlken ıdeologııalyq shara. Osyny paıdalanyp, eldiń sanasyna quıyp qalý qajet. Táýelsizdikten tátti, azattyqtan asyl eshteńe joq ekenin urpaqtyń sanasyna sińirý kerek», dedi ol óz sózinde.
Otyrys sońynda Memlekettik hatshy Gúlshara Ábdiqalyqova Qazaqstan Táýelsizdiginiń 25 jyldyǵyn ótkizýge arnalǵan memlekettik komıssııanyń otyrysynda ataýly jyldy atap ótýdiń medıa-josparyn 25 sáýirge deıin bitirýdi tapsyrdy. «Eń mańyzdy máselelerdiń biri – mereıtoı aıasyndaǵy sharalardy aqparattyq-ımıdjdik qoldaýdy qamtamasyz etý. Osyǵan baılanysty Investısııalar jáne damý mınıstrligine Qazaqstan Respýblıkasy Prezıdenti janyndaǵy Ortalyq kommýnıkasııalar qyzmetimen, múddeli ortalyq jáne jergilikti organdarmen birge Táýelsizdiktiń 25 jyldyǵyn merekeleýdiń medıa-josparyn 25 sáýirge deıin jasaýdy tapsyramyn», dedi G.Ábdiqalyqova.
Memlekettik hatshy sonymen qatar, Prezıdent janyndaǵy Ortalyq kommýnıkasııalar qyzmetinde úlken tájirıbe jınaqtalǵanyn, túrli patrıottyq ınternet-aksııalar jáne arnaıy jobalar jasalǵanyn tıek ete kele: «Jyl boıy osy jumystardy atqaryp shyǵý kerek. Jańa óndiristerdiń ashylýyn, jańa jumys oryndarynyń paıda bolýyn, áleýmettik-mádenı jáne turmystyq nysandardyń paıdalanýǵa berilýin keńinen kórsetý kerek», dedi.
Otyrys aıasynda Memlekettik komıssııa músheleri men shaqyrylǵan qonaqtar Táýelsizdiktiń 25 jyldyǵyna arnalǵan «Táýelsizdik tarıhy: Qazaqstan jolynyń qaryshty qadamdary» atty derekti fotokórmeniń ashylý rásimine qatysty.
Láıla EDILQYZY,
«Egemen Qazaqstan».
