Taılandta mereke kúnderi jol apatynan 50-den astam adam qaza tapty

ASTANA. 13 sáýir. Taılandta Songkran jańa jyl merekesiniń alǵashqy kúnderi jol apatynan 52 adam mert bolyp, 431 turǵyn túrli deńgeıde jaraqat aldy. Sondaı-aq, 387 jol-kólik oqıǵasy tirkeldi. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. Polısııa qyzmetkerleriniń aıtýynsha, jol apatynyń 37 paıyzy jyldamdyqty shamadan tys arttyrǵannan, al 27 paıyzy mas kúıinde kólik júrgizgennen bolǵan. Merekeniń alǵashqy kúnderi bolǵan jaǵdaı ótken jylmen salystyrǵanda eki esege kóp. Aıta keteıik, Taılandta Songkran merekesi 10 sáýir men 17 sáýir aralyǵynda toılanady. Resmı túrde demalys kúnderi 13-15 sáýir aralyǵy bolǵanymen, kópshilik birneshe kúnge demalys alady. Osy ýaqyt aralyǵynda jol-kólik oqıǵalary jıi tirkelgendikten «óte qaýipti apta» dep atalyp ketken. Málimetterge sáıkes, bul kúnderi ortasha eseppen alǵanda árbir saǵat saıyn 2,3 adam qaza taýyp, 160 adam túrli deńgeıde jaraqat alady. Aıan Ábdýálı. Derek, foto: RIA «Novostı».