Bıyl Aqtóbe oblysynda 184 myń gektar jer satylady

AQTО́BE. 13 sáýir. Ulttyq ekonomıka mınıstrliginiń oblys ákimdigimen birlese otyryp, «100 naqty qadam» Ult josparyn júzege asyrý aıasynda ótkizgen keńesinde Jer kodeksiniń jáne basqa zańnamalyq aktilerge engizilgen ózgerister keńinen túsindirildi. Bul týraly egemen.kz tilshisi habarlady. Oblystyq basqarmalar men departamentter basshylary, aýdan ákimderiniń orynbasarlary jáne aýyldyq ákimder, aýyl sharýashylyǵy taýar óndirýshileri qatysqan alqaly jıynda  aýyl sharýashylyǵy maqsatyndaǵy jerlerdi  tıimdi paıdalaný, qurylys salasyndaǵy jańa engizilimder, sondaı-aq, salyq jáne keden zańnamalaryna engiziletin ózgerister syndy ózekti máseleler talqylandy. Keńesti qysqasha sóz sóılep ashqan oblys ákimi Berdibek Saparbaev  óńirde 25 mıllıon gektar aýyl sharýashylyǵy maqsatyndaǵy jer bar ekenin, sonyń 1 mıllıon gektarǵa jýyǵy eginshilikke jaramdy ekenin tilge tıek ete kelip, 112 myń gektar jerdiń paıdalanylmaı jatqanyn atap ótti.  Bıyl aýksıon arqyly 184 myń gektar jer satylatynyn, osynshama alqapty satýǵa daıyndaý qujattaryn jasaýǵa 58 mıllıon teńge qarjy bólingenin jetkizdi. Keńeste sóz alǵan Ulttyq ekonomıka vıse-mınıstri Qaıyrbek О́skenbaevtyń aıtýynsha, qazirgi kúnde elimizdegi aýyl sharýashylyǵy maqsatyndaǵy jerlerdiń 99,5 mıllıon gektary, ıaǵnı 99,7 paıyzy uzaq merzimdi jalǵa berilgen, tek 1,3 paıyzy jeke menshikte eken. «100 naqty qadam» Ult josparynyń 35jáne 36 qadamdaryn júzege asyrý asıaynda aýyl sharýashylyǵy maqsatyndaǵy jerlerdi jeke menshikke berýdiń jańa mehanızmin engizý maqsatynda 2015 jylǵy 2 qarashada Qazaqstan Respýblıkasynyń «Jer kodeksine ózgerister men tolyqtyrýlar engizý týraly» Zańy qabyldandy, bul zań ústimizdegi jylǵy 1 shildeden bastap kúshine enedi. Ol bul ózgerister men tolyqtyrýlarda memleket menshigindegi aýyl sharýashylyǵy maqsatyndaǵy jer telimderin jeke menshikke aýksıon arqyly berý, jalǵa berilgen jer telimderin satyp alý boıynsha jeńildik sharttaryn usyný, jalǵa alynǵńan aýyl sharýashylyǵy maqsatyndaǵy jerlerdi paıdalaný boıynsha shekteýlerdi alyp tastaý, aýyl sharýashylyǵy jerleriniń  nysanaly maqsatyn ózgertý rásimin alyp tastaý qaralǵanyna erekshe toqtaldy.  «Atalaǵan sharalar aýyl sharýashylyǵy maqsatyndaǵy jerlerdi naryqtyq aınalymǵa engizý úshin qajettijaǵdaılar týǵyzady, jer qorlaryn utyrly paıdalaný boıynsha jer ıeleriniń jaýapkershiligi men yntasyn artyrady», dep túıindedi oıyn Qaıyrbek О́skenbaev. Sondaı-aq, satýdan alynatyn salyqty qoldanýdyń álemdik tájirıbesin zerdeleý boıynsha jumys júrgizýde, shaǵyn jáne orta bıznes úshin patent jáne ońtaılatylǵan deklarasııa negindegi arnaýly salyq rejimderin, sharýa jáne fermer qojalyqtary úshin arnaýly salyq rejimderin reformalaý máseleleri pysyqtalýda ekeni, qoldanystaǵy salyq jeńildikteri men salyqtyq jáne kedendik úrdisterin ákimshilendirý tetigine taldaý jasalap jatqany  sóz boldy. Ulttyq ekonomıka vıse-mınıstri Qaıyrbak О́skenbaev, osy mınsıtrliktiń salyq jáne keden departamenti dırektorynyń orynbasary Daryn Ábdýálı keńeske qatysýshylardyń jer máselesine qatysty birqatar saýaldaryna jaýap berdi. Satybaldy Sáýirbaı. Derek, foto: egemen.kz