ALMATY. 13 sáýir. Almatyda Dúnıejúzilik densaýlyq saqtaý kúni keń aýqymda atalyp ótti. Bul týraly egemen.kz tilshisi habarlady.
Osy aptada Almaty qalasy densaýlyq saqtaý basqarmasy qalalyq ákimdiktiń qoldaýymen Almaty qalalyq salaýatty ómir salty ortalyǵymen birige otyryp, Dúnıejúzilik densaýlyq kúnine arnalǵan aýqymdy aksııa ótkizdi.
Bıylǵy aksııa ár adamnyń óz densaýlyǵyna degen jaýapkershiligin arttyrýdy nasıhattaı otyryp, turǵyndar arasynda zıka vırýsy týraly aqparattandyrýdy kózdedi.
Dúnıejúzilik densaýlyq saqtaý uıymy, zıka bezgegin týdyratyn vırýsty halyqaralyq deńgeıdegi qater dep taýyp otyrǵany belgili. Bul týraly Jenevadaǵy tótenshe jaǵdaılar komıtetiniń jıynynda habarlanǵan.
Bul bastamanyń jastar úshin de, qalalyqtar úshin de paıdasy kóp boldy. Ádettegideı tegin qyzmet kórsetetin, úzdik dárigerlerden turatyn «Densaýlyq qalashyǵy» jumys istedi. Qajet dep tapqandarǵa kardıolog, endokrınolog, pýlmanolog, allergolog, gerıatr, gastroenterolog, nevropatolog, dermatolog, revmatolog, ftızıatr, nefrolog, onkolog, terapevt, psıhıator, qandaǵy qant jáne holesterın belgileý syndy mamandardyń qyzmeti tegin usynyldy.
Sondaı-aq, aksııada tanymal sportshylar sóz alyp, jastardy sportqa úndep, estrada juldyzdary óner kórsetti.
Aınash Esalı.
Derek, sýret: egemen.kz.
