Qaraǵandy oblysynda eki aýdannyń ákimderi taǵaıyndaldy

QARAǴANDY. 14 sáýir. Qaraǵandy oblysynda Shet jáne Aqtoǵaı aýdandarynyń jańa ákimderi taǵaıyndaldy. Bul týraly oblys ákiminiń baspasóz qyzmetine silteme jasaǵan egemen.kz tilshisi habarlady. Prezıdent Ákimshiliginiń jáne depýtattardyń kelisýimen, oblys ákiminiń ókimimen Shet aýdanynyń ákimi laýazymyna Marat Jandáýletov taǵaıyndaldy. Marat Jandáýletov 1957 jyly týǵan. Eki joǵary bilimi bar. 1980 jyly Qaraǵandy memlekettik ýnıversıtetin, 1991 jyly Almaty saıasattaný jáne basqarý ınstıtýtyn támamdaǵan. Mamandyǵy boıynsha hımııa pániniń muǵalimi jáne saıasattanýshy. Eńbek jolyn Qaraǵandy ob­lysyndaǵy Aqtas kentinde muǵalim bolyp bastaǵan. 1984-1991 jyldary partııalyq qyzmette boldy. 1991 jyldan beri memlekettik kyzmette. Memlekettik qyzmettegi eńbek jolyn Jańaarqa aýdanynyń ákimi apparatynyń referenti qyzmetinen bastap, keıin atalǵan aýdan ákiminiń orynbasary qyzmetine taǵaıyndaldy. Bul taǵaıyndaýǵa deıin Jańaarqa aýdany ákiminiń áleýmettik máseleler jónindegi orynbasary qyzmetin atqardy. Sondaı-aq, Prezıdent Ákimshiliginiń jáne depýtattardyń kelisýimen, oblys ákiminiń ókimimen Aqtoǵaı aýdanynyń ákimi laýazymyna Saltanat Ábeýova taǵaıyndaldy. Saltanat Ábeýova mamandyǵy boıynsha «orta mektepterdegi nemis jáne aǵylshyn tilderi pániniń muǵalimi». Almaty pedagogıkalyq shet tilder ınstıtýtyn támamdaǵan. Aqtoǵaı aýdanyndaǵy Qyzylaraı selosynda nemis tili pániniń muǵalimi retinde eńbek jolyn bastap, komsomol, partııa uıymdarynda qyzmet etti. 1992 jyly Aqtoǵaı aýdany ákiminiń apparatyna qyzmetke qabyldanyp, túrli laýazymdarda, onyń ishinde, uıymdastyrý jáne kadr jumysy bóliminiń meńgerýshisi bolyp qyzmet etti. Aýdan ákiminiń orynbasary, keıin Aqtoǵaı aýdanynyń ákimi qyzmetine taǵaıyndaldy. Bul taǵaıyndaýǵa  deıin Qaraǵandy oblysynyń mádenıet, muraǵat jáne qujattama isi basqarmasy basshysynyń orynbasary qyzmetin atqardy. Qaırat Ábildınov. Derek, foto: Qaraǵandy oblysy ákiminiń baspasóz qyzmeti.