Panda jylaǵan jaz

nemese ataqty balýan Ábilseıit aǵamen Beıjińdegi esten ketpes on kún ...2008 jyldyń 12 tamyzy. Almaty halyqaralyq áýejaıy. Hansýlar 8 degen sandy qasıet tutady ǵoı, 2008 jyldyń 8 tamyzynda keshki saǵat 8-den 8 mınót, 8 sekónt ótkende tórtkil álemdi dúr silkindirgen Beıjińdegi Jazǵy Olımpıada alaýynyń tutanǵany belgili. Almatydaǵy týrısterdi Olımpııa oıyndaryna aparýǵa quqyly jalǵyz halyqaralyq «Komplıt-servıs» kompanııasy arnaıy kıindirgen Olımpıada sımvolıkasy bar jeıdeshe, qoldarynda Qazaqstannyń týlary bar bir top munaıshylardy jolyqtyrdyq. Olar – elimizdiń batysynda, Qytaı eliniń basqarýyndaǵy kompanııada jumys isteıtin qandastar eken. Kompanııa elýge tarta jumysshyny tegin joldama berip, Olımpıadany tamashalaýǵa jiberipti. Sirá, qaryshtap damyp kele jatqan Aspanasty eliniń tańǵajaıyp jetistikterin qazaqstandyqtardyń kózben kórip, elge oralǵan soń aýyzdarynyń sýy quryp jerlesterine aıtsyn degen esebi bar bolsa kerek. Áýejaıdaǵy áńgime Áýejaıdyń halyqaralyq reıs­ter ushatyn alańyna Beıjińge baratyn týrıs­ter jınala bastady. Bir ýaqytta ekinshi qabatqa kóterilip kele jatqan boıy terekteı, zor deneli, qasynda jubaıy Kámash apaı bar, ańyz aǵa Ábilseıit Aıhanovty kórdik. Janynda balalary men nemereleri bar. Qajymuqannan keıingi elimizdiń bas balýany Ábekeń sol jyly 70 jasqa tolyp, Almaty oblysynyń ákimi Serik Úmbetov oǵan qurmet kórsetip, mereıtoıyn el esinde qalatyndaı atap ótip, oblystyń qurmetti azamaty ataǵyn bergen bolatyn. Bizdiń quttyqtaýymyzdy jyly qabyldaǵan aǵamyz rızashylyǵyn bildirdi. – Bul aǵalaryńnyń tuńǵysh Olım­pıadasy. О́zi keshe ǵana syrqatynan aıyǵyp, aýrýhanadan shyqty. Mu­nyń al­dynda da eki ret ınsýlt al­yp, em­delgenimen, bizdiń sózimizdi tyńdamaı Aspanasty eline attanyp barady. Aǵalaryńa kóz qyrlaryńdy sala júrińder, – dep Kámash apaı Ábekeńe urlana kóz saldy. – Apaılaryń aıta beredi. Kezinde 11 dúrkin Qazaqstan chempıony atanyp, Odaq birinshiligi men KSRO halyqtary spartakıadasynda, iri halyqaralyq týrnırlerde birneshe ret top jaryp, Olımpıada oıyndarynyń úsh dúrkin chempıony A.Medved, A.Ivanıskıı, Olımpıadanyń kúmis júldegerleri Kýbat pen Kmentti, túrik Ilmazdy, úndilik Bın Sıngh, japon Sasakı men Kavanıo, vengr Rezııaktyń jaýyrynyn jerge tıgizsem de baǵym janbady. О́zimniń de qyrsyq minezim bar, moıyndaımyn, biraq ultym basqa bolǵan soń jol meniki bolsa da san ret Álem chempıonattary men Olımpıada oıyndaryna jibermedi. Oǵan moıymadym, Monǵolııada, Aýǵanstanda, Qytaıda birneshe jyl sol elderdiń balýandaryn baptadym. Birneshe jyl erkin kúresten Qazaqstan qurama komandasynyń bas jattyqtyrýshysy qyzmetin atqar­ǵan kezde eldiń dańqyn shyǵarǵan A.Buǵy­baev, M.Nádirbekov, R.Nurmanov, A.Mu­sabekov, basqa da sańlaqtardy baptadym, qanat qaqtyrdym. Beıjiń Olımpıadasynyń Almatydan bastaý alýy, Elbasy N.Nazarbaevtyń ózi bas bolyp tuńǵysh alaýdy alyp júgirgeninde, bile berseńiz, saıası mán-maǵyna jatyr. Uly qytaı halqynyń Nurekeńe osynshama qurmet kórsetýi biz úshin baqyt, – dep aǵynan jaryldy. – Aspanasty eline sizdi kimder jiberdi? – degen saýalymyzdy asaý mi­nezi bar aǵamyz unatpaı qalsa kerek, jaq­tyrmaǵandaı kózin alartyp, daýysyn kóterip aldy da: – Burynǵy sport basshylarynyń aldyna baryp, meni Olımpıada oıyndaryna jiberińizdershi dep ótingen emespin. Ol maǵan jat qylyq, ózderi syılap jiberip jatsa, qarsy bolmas edim. Osy joly Sport mınıstri Temirhan Dosmuhanbetovtiń ózi telefon shalyp, aǵa Beıjińge baryp, qazaq eli sańlaqtarynyń ónerin tamashalap qaıtyńyz degende, tolqydym, bizdi de eske alatyn azamattar bar eken dep rıza boldym. Temirhan Olımpıada oıyn­darynyń chempıondary Jaqsylyq Úshkempirov, Anatolıı Hrapatyı, Olga Shıshıgına, Ermahan Ybyraıymovty da óz qarjysyna jiberipti. Azamat degen osy emes pe, – deı bergende, qasymyzǵa Jaqsylyq pen kezinde erkin kúresten Odaqta top jarǵan balýan Asqarbek Imanqulov kelip, qaýqyldasyp qaldyq. Sóıtip, Almaty áýejaıyn qazaqstandyq týrıster kóńildi ázil-qaljyńǵa toltyryp tastadyq. Alyp ushaqta dzıýdoshy Ashat Jitkeevti jolyqtyrdyq. Aspanda berilgen bata Belgilengen ýaqytta «A-320» áýe laıneri yńyranyp kókke kóterildi de, kún­shyǵysty betke aldy. Beıjińge deıin áýe kemesi bes jarym saǵat ushpaq. Ala­taýdyń jazdyń aptabynda da erimeıtin, tóbesin máńgi qar men muz basyp jatqan kórinisi ǵajap, kórki kóz tartady. Sálden keıin ushaq salonynda mamyrajaı tynysh­tyq ornady. Ábilseıit aǵamen ornymyz qatar eken. Taýdaı bolyp otyrǵan balýan ekeýmizge kreslo tarlyq etetindeı. О́zim de etjeńdi edim, onyń ústine qasymda salmaǵy 147 kılo, boıy 197 santımetr (ushaqqa otyrǵanda surap alǵanmyn) bahadúr otyrǵan soń ózimdi qolaısyz sezinip, typyrshı bastadym. Ábekeń kózin alartyp bir qaraǵanda tynshı qalamyn da, artynsha árli-berli qozǵala bastaımyn. Aqyry shydamy taýsylsa kerek, jýan daý­symen gúr ete qalǵanda, selk ete tústim. – О́ziń tipti mazasyz jan ekensiń, qozǵala bermeı, tynysh otyrsańshy. Úndemeı qalatyn men be. – Dúnıeniń keńdigin qaıteıin, tipti maǵan oryn qaldyrmadyńyz ǵoı, – dep aqtaldym. Ábekeń saǵan daýa joq eken degendeı, jaqtyrmaǵanyn bildirse de, úndemedi. Aqyry tuıyqtan shyǵaratyn oı kele qaldy. Ekinshi qatarda dzıýdoshy Ashat Jitkeev otyrǵan. Symbatty, uzyn boıly Ashatymyz kóńilsiz. Eshkimmen tildespeıdi. Ashatpen burynnan tanys­pyz. Aıshylyq alystaǵy Avstralııanyń Sıdneı qalasynda jáne Afınada ót­ken Olımpıadada birge bolǵanbyz. Dzıý­doshynyń qos Olımpıadada joly bolmady. Altynshy qurlyqta dúbirli dodanyń ashylý saltanatynda elimiz quramasynyń kók baıraǵyn ustap shyq­qanymen, senim bıiginen kórine almady. Afınydaǵy sátsizdikten keıin tatamıge endi shyqpaımyn dep sóz bergen. Alaıda, bapkerleri men dostary Ashatty «er kezegi úshke deıin, baǵyńdy taǵy bir ret synap kór» dep úgittegen eken. Úmit aldamapty. – Qazaq eliniń jankúıerleri úshinshi Olımpıada da Ashat osy joly bir medaldy qaıtse de taqymǵa basar, dep úkili úmit kútýli. Namysty janyp, Beı­jińde býynyńdy bekitip, jasyndaı jarqyldaıtyn kez keldi. Tatamıde dzıýdoshylar jarysy bastalyp ketti emes pe, nege kesh bara jatyrsyń? – dep Ashatty sózge tarttyq. – Bapkerimiz ekeýmiz taktıkalyq qýlyq jasadyq. Men tatamıge 14 ta­myzda shyǵamyn. Demek, oǵan bir kún qaldy. Ádette, sportshylardyń jarys ótetin jerdiń klımatyna beıimdelýine bes-alty kún kerek. Al men beıimdelý merziminen buryn kúresemin. Osy joly babymdamyn. Ábilseıit aǵa, Jaqsylyq, barlyqtaryńyzdy kútemin, – dedi Ashat. – Ábilseıit aǵa, Ashattyń joly bolsyn, aq batańyzdy berińiz, – dep qolqa saldym. Kesek denesimen Ashatqa burylyp, oılana qalǵan balýan óleń joldaryn shubyrta jóneldi. «Babalar máńgi, qorǵaǵan dala, Urpaqqa máńgi qaldyrǵan mura. Jalǵasyn máńgi babalar jolyn, Ul menen qyzy, qazaqtyń ǵana!» – degen batyrdyń batasy bárimizdi serpiltip tastady. Artynan bildik, Ábekeń óleń shyǵarýdy bala kezinen serik etipti. Tipti, Elbasy N.Nazarbaevqa arnaǵan óleńin kórsetti. Balýan aǵanyń taǵy bir qasıeti, óleń jazýǵa áýestigimen birge kózben kórgenderin kókeıge túıip, kúndelik jazýdy erteden bastapty. Túıe balýanmen syrlasqan tún 17 mıllıon halyq mekendeıtin Qytaı astanasy qulpyryp ketipti. Biz túngi 24.00-de Beıjiń halyq­ara­lyq áýejaıyna kelip qondyq. Aýa qapyryq, demalýdyń ózi muń. Túngi astana tipti ásem. Kóshelerdegi saýda dúkenderi men saýyqtyrý oryndarynyń mańdaıshasyndaǵy jazýlar jarq-jurq etedi, kóshe tap-taza. Aıtýly oqıǵaǵa oraı qaladaǵy úsh mıllıonnan asatyn kólikterdiń jartysy toqtatylypty. Bir kúni taq, ekinshi kúni jup sandy kólik­ter kóshege shyǵatyn kórinedi. Sátti sheshim Beıjiń kósheleriniń tyǵynyn azaıtqanyn ańǵardyq. Onyń ústine munda sońǵy eki-úsh jylda kóptegen aınalma joldar salynǵan. Avtobýs birer saǵatta jańadan sa­lyn­ǵan 32 qabatty «Iý-Iаng» qonaq úıi­ne alyp keldi. Ashatty áýejaıdan Olımpıada qalashyǵynyń arnaıy beki­tilgen menedjerleri kútip aldy. Ol qoshtasyp jatyp: «Aǵa, sizderdi tatamıge shyǵatyn kúni kútemin», dep bizben qımaı qoshtasty. «Ashat, kelemiz, osy joly qa­laıda medal alatyn bol», dep Ábekeń barlyǵymyz úshin aq tilegin aıtty. Saǵat tili túngi birge jaqyndap qalsa da qonaq úı holynda qaptaǵan qazaq­standyq jankúıerler. Olar týrısterdiń kezekti toby keletininen habardar bolsa kerek, máre-sáre bolyp qaldyq. Jaq­sylyq pen Asqarbek bir bólmege, Ábilseıit aǵanyń shákirti, kezinde erkin kúres úıirmesine ózi alyp kelgen, sońynan KSRO-nyń eki dúrkin, Qazaqstannyń 10 dúrkin chempıony atanǵan ataqty balýan Amanjol Buǵybaev kórshi bólmege, al Aıhanov ekeýmiz 10-shy qabattaǵy 1009 bólmege ornalastyq. Sharshaǵandyqtan ba, joq álde qatty áserlenip, tolqyǵandyqtan ba, jýyq arada kirpik ilinseıshi. Bir buryshta tósekke áreń syıyp, onysy syqyrlap, jaısyz jatqan aǵa áńgimege shaqyrdy. – «Egemen Qazaqstan» gazetiniń Shyǵys­­taǵy tilshisi ekenińdi bildik. Jal­­­py, jýrnalıster men týraly kóp jazdy. Belgili jazýshy Qaldarbek Naımanbaevtyń meniń ómir jolymdy arqaý etip jazǵan «Dańq tuǵyrynda» degen derekti hıkaıa­ty balalar men sport­ty serik etken jasóspirimderdiń súıikti shyǵarmasy ekeni jasyryn emes. Jerles jazýshy Sháken Kúmisbaevqa rızamyn, aralas-quralas boldyq, bir aýylda kórshi turdyq. Gazetterińizdiń bas redaktory Janbolat Aýpbaevtyń 1994 jyly jazǵan «Túıe balýan» maqalasy, belgili sport jýrnalısi Nesip Júnisbaevtyń, basqa da qalamgerlerdiń erkin kúreske qalaı kelgenimdi, Odaq kezinde kúres basshylarynyń meni, basqa da talantty balýandardy shetqaqpaı qylyp, Álem chempıonattary men Olımpıadaǵa aparýdan at-tondaryn ala qashqany jaıly materıaldary kópshiliktiń izdep júrip oqıtyn dúnıesine aınaldy. О́tkenge ókinýdiń qajeti shamaly, biz jetpegen bıikterdi keıingi tolqyn jastardyń ba­ǵyndyrýyn armandaımyz. Eń bastysy, babalarymyz armandaǵan táýelsizdikke qol jetkizdik. Endi talanttardy ózimiz tańdaı alamyz, baqtaryn ashýǵa múmkindik týdy. Alaıda, kúrestiń eki túrinde de kilemde beldesip júrgen jigitterdiń jasaǵan ádisterine ishim pysady. Máselen, kezinde fransýz, keıin klassıkalyq kúres atanyp ketken grek-rım kúresin alaıyq. Parıjdegi álem chempıonatynda babamyz Qajymuqannyń top jarǵanyn bilemiz. Alaıda, kúrestiń ádis-tásilderi jıi ózgeredi. Qazirgi kúrestegi ádis jankúıerdi jalyqtyryp jiberedi. Birin-biri ıterip, jambasqa salý, basqa da tásilderdi sırek kóresiz. О́zim tik turyp kúresýdi unatatynmyn. Al qarsylastarym eń­keıip, tabanyn jerge tirep turyp alady. Kóz ilespeıtin jyldamdyqpen ishke ótip ketem de, alyp uramyn. Kezinde jeńil atletıkamen shuǵyldanǵanymnyń paıdasyn kúresken kezde kóp kórdim. Qazaq jastary arasynan Jaqsylyq pen Shámildiń Máskeý Olımpıadasynan altyn alqa alǵanyna 28 jyl ótipti. Altyn qursaqty analarymyz áli talaı chempıondardy dúnıege ákeler. Alaıda, ol úshin kóp ýaqyt kerek, – degen balýannyń sózi qulaǵymda qalyp qoıypty. Túnniń bir ýaǵyna deıin áńgime tıegin aǵyt­tyq. – Qytaılar shap-shaǵyn súıkimdi panda dese esteri ketip, ákeleriniń atyn umy­tady dep jatady. Sol aıýdy Beıjińdegi ulttyq zoobaqtan kórýge bolady degendi aıtty keshe birge ushyp kelgen jigitter. Ýaqyt bolsa, sony kórip qaıtaıyqshy, – dedi balýan aǵa. Men únsiz kelistim. Alaıda, eki kúnnen keıin tońazytqyshtaǵy muzdaı sýyq sýdy simirgen Ábekeń qatty syrqattanyp qaldy. Janymyz qalmaı kúttik. Tynysh otyratyn men be, onyń ústine gazetke jedel habarlar jiberý kerek, arly-berli shaýyp ketkenimdi unatpaı qalǵan balýan bir kezde qatty urysty. – Aǵańnyń syrqattanyp qalǵany mynaý. Maǵan dári-dármek taýyp berseń neń ketedi. Osynda jaqyn dosymnyń elshilikte jaýapty qyzmet atqaratyn Asqar Seıdýálıev degen kúıeý balasy bar. Onyń jubaıy Gaýhar Ábisheva aǵalaryn qurmetteıtin aıaýly bala, ekeýine soqpaı ketsem renjıtini sózsiz. Kóp sózdi qoıyp erteń meni solarǵa aparatyn bol, – dep nyǵyzdaı sóıledi. Eriksiz kelistim. О́zekti órtegen ókinish Beıjińge kelgen kúnniń erteńinde grek-rım kúresi ótip jatqan atshaptyrym, eńseli de jaryq sport keshenine keldik. Ábekeń, Jaqsylyq, Asqarbek, Nesip tórteýmiz qatar jaıǵastyq. – Búgin 60 kılo salmaqta Darhan men Roman beldesýge shyqpaq. Sońǵy kezderi balýandarymyz ala-qula óner kórsetýde. Odaq kezinde Qazaqstannyń grek-rım kúresi sheberleri alǵa tek reseı­likterdi jiberip, ekinshi oryndy eshkimge bermeıtin. Sonaý jetpisinshi jyldardyń ortasynda Almatyda ótken KSRO halyqtary spartakıadasynda komandalyq esepte birinshi orynǵa shyqqanbyz. Olımpıada oıyndarynyń qos dúrkin chempıony V.Rezansev, jampozdar A.Nazarenko,V.Bakýlınniń ataq-dańqy jer jaratyn. Bir Dáýlettiń ózi jarty komanda ispettes bolatyn. Olımpıada oıyndary men Álem chempıonattaryndaǵy tabystaryn bylaı qoıǵanda KSRO-nyń jeti dúrkin jeńimpazy degen ataq tek Dáýlet Bolatulynyń mańdaıyna jazyldy. Kezinde Qyrǵyzstannan attaı qalap alyp kelgen Iý.Melnıchenkonyń 1996 jylǵy Atlantadaǵy altynynan beri de birshama ýaqyt ótipti. Beıjińde altynǵa qol jetkize alsaq asyǵymyz alshysynan túser edi, – dep Jaqsylyq oıyn túıdi. – О́z basym grek-rım kúresin unat­paımyn. Erkin kúrestegideı ádis-tásildi ońdy-soldy qoldanýǵa múmkindik shamaly. Al osy joly erkin kúres sheberleri Beıjińde tórt birdeı altyn alqa alady, dep balýan aǵamyz yrjıyp kúldi. Bar­lyǵymyz ań-tańbyz, qaljyńy ma, joq, shyn aıtyp tur ma dep ańtarylyp qaldyq. Joq, shyny eken, júzi qatýlana qalypty. Boz kilemge Darhan shaqyryldy. Onyń qarsylasy – nemis Taper Markýs. «Iá, arýaq!» dep Ábilseıit aǵa aıqaı salǵanda qatty da, qaharly daýystan selk ete qalǵan jankúıerler biz jaqqa eleń etip qaraı qaldy. Balýan aǵa­nyń eki kózi kilemde. Árli-berli qozǵalǵan kezde otyrǵan oryndyǵy syqyrlap, synyp ketetindeı. Grek-rım kúresiniń erejesi qyzyq, alǵashqy bir mınótte balýandar bir-birine tásil qoldana almasa tóreshi shar sýyrady. Darhanǵa kók shar shyqty. Amal bar ma, jerlesimiz parterge turdy. Eger nemis Darhandy aýda­ryp tastasa oǵan bir upaı jazylady. Keıde sol bir upaı jeńiske jetkizedi. Baıqaımyn, qasymda otyrǵan Ábekeń qobaljýly. Aqyry kilemge jelimdelip qalǵan Darhandy qarsylasy aýdara almaı, bizdiń jerleske bir upaı jazyldy. Birinshi kezeń 2:1 esebimen Darhannyń paıdasyna sheshildi. Ekinshi kezeńde de Darhan shabýylǵa jıi shyǵyp, aqyry jeńisti julyp aldy. Qýanyshta shek joq, qıqýǵa basyp jatyrmyz. Darhan biz otyrǵan jaqqa jymıyp qarady, balýan aǵaǵa rızashylyǵyn bildirip basyn ıdi. Roman Meleshın de qarsylasy arab jigiti, Avstrııanyń namysyn jyrtýǵa kelgen Hasan Shahsavannan basym tús­ken kezde Aıhanov aıqaılap ornynan ushyp turdy. Darhan ekinshi beldesýinde de qytaı balýany Lı Iýannan basym túskenimen, fransýz Genattan utylyp qaldy. Amal bar ma, eger ony utqanda fınalǵa shyǵar edi. Qola medal úshin aıqasta belarýs balýany M.Sımonovqa ese jiberip aldy. Ábekeńniń túri buzy­lyp ketken. Jaqsylyq ta qatty ókindi. Qol­ǵa túsip turǵan medal ýystan shyǵyp ketkeni qalaı degendeı bizge tunjyraı qarady. Bul kúni Roman Meleshın de utyl­dy. Sol kún bizder úshin sátsiz aıaqtaldy. Ashat úmitti aqtady Ashat Jitkeev tatamıǵa shyǵatyn 14-shi tamyzda Qazaqstannan kelgen bir top jankúıer erte turyp aýqattanyp aldyq ta jabyq stadıonǵa keldik. Syrqaty syr bere bastaǵan Ábekeńdi ertip aldyq. «Ýáde qudaı sózi, batamdy berdim, Ashat búgin qaıtse de bir medal alady» degen balýannyń sózi maıdaı jaǵyp barady. 100 keli salmaqtaǵy dzıýdoshylar qos kilemde kúrese bastady. Ashattyń qarsylasy – Kýveıt balýany Talal Ale­nazı. Ashat jarys bastalar aldynda bizdi alystan kórip qaldy da, jymıyp qolyn bulǵady. Onyń ústine Ábilseıit aǵanyń «Ashat, saǵan senemiz» degen daýysyn estigen. Talaldy da, kelesi aınalymda Bosnııadan kelgen Amel Mekıchti de Ashat taza jeńdi. Shırek fınalda, jartylaı fınalda da Ashat sheberligin kórsetip, qarsylastaryn erkin eńserdi. О́kinishke qaraı, fınalda monǵol dzıýdoshysy Naıdan Tývshınbaıarǵa jol berip qoıdy. Ashattyń kúmis alqasyna qýandyq. Beıjińdegi 12 kún zý etip óte shyqty. Qazaqstandyqtar Beıjińde 2 altyn, 4 kúmis, 7 qola medalmen komandalyq esep­te 29-shy orynǵa taban tiredi. Qa­zaq­stannyń bas balýanymen birge Taımýraz Tıgıev, Marıd Mýtalımov, Áset Mámbetovtyń kúresin tamashalap, olardyń kúmis pen qolany alǵan kez­degi qýanyshyn bólistik. Al, Ilıa Ilınniń aıdy aspanǵa shyǵaryp, altynnan alqa taǵynǵan kezdegi ataqty balýannyń balasha qýanyp, jylap jibergeni barlyǵymyzdyń kóńilimizdi bosatty. Qazaq eliniń namysyn jyrtyp, el dańqyn arttyrǵan sańlaqtarǵa balýan aǵamyz batasyn berdi. Esten ketpes 12 kún «Komplıt-servıs» halyqaralyq týrıstik kompanııasy bizdi Qytaı qor­ǵanyna, basqa da tarıhı oryndarǵa alyp bardy. Myń jyldyq tarıhy bar qytaı shaıyn iship kórdik. Zoobaqqa barǵan kezde pandany, quryp bara jatqan qustardy tamashaladyq. Zoobaqta ańnyń 570 túri, bes myńnan astam qustar men janýarlar bar eken. Álemde tek Qytaıda bar, sany kúrt azaıǵan pandanyń janynda balýan aǵa ekeýmiz uzaq turyp, tesile qaradyq. O, ǵajap, qýyrshaqtaı pan­danyń kózinde jas tur. Júregim dir ete qaldy. Ábekeń de tolqyǵan syńaıly. Zoo­baqtan shyqqannan soń uzaq ýaqyt únsiz qaldy. ...Qaıtarda da ushaqta qatar otyrdyq. Balýan óziniń jankúıer retinde qatysqan alǵashqy Olımpıadasynan qatty áser­lengen sııaqty. Alaıda, qorjyndaǵy qos altynǵa kóńili tolmaıtynyn ashyq bildirdi. Ásirese, kúresten kóńili qa­lyp­ty. «Qazaqtyń qara domalaqtary kúresten jırene bastaǵan ba? О́ziń oı­lashy, osy joly bir kúmis pen bir qolany legıonerler alyp berdi. Jaq­sylyqtyń altynynan keıin qansha ýaqyt ótti. Shirkin, qazaǵymyz altyn­nan alqa taǵynyp, Beıjiń tórinde Án­uranymyz shyrqalǵanyn estisem dep kelip edim, ol armanym oryndalmady. Kúres – qazaqtyń namysy, ar-abyroıy. Barlyǵymyz kúresti aýylda júrgende bastadyq. Demek, aýyl sportyn jandandyrý qajet. Bir kezderi kez kelgen aýylda sport nusqaýshysy degen shtat bolǵan. Qazir ol joq. Talantty balalarǵa kóńil bólip, olarǵa tájirıbeli bapkerler tálim-tárbıe berse, asyǵymyz alshysynan túseri sózsiz. Qazaq eliniń ósip-órkendeıtinine, sporttyń alǵa basatynyna óz basym senemin», dep Ábilseıit aǵa aǵynan jaryldy. ...Sodan beri 8 jyl ótipti. О́kinishke qaraı, kúrestiń úsh túrinen ul-qyz­da­ry­­­myz ázirshe qazaqtyń bas balýany Ábil­seıit Aıhanov armandaǵan altyn alqaǵa qol jetkize almaı keledi. Alda – Rıo-de-Ja­neıro Olımpıadasy. Múmkin tórt aıdan keıin sol arman oryndalatyn shyǵar. Rıo tórinde qazaq balýandary Olımp shyńyna kóterilip jatsa, bas balýannyń rýhy rıza bolar. Namysty janyńdar, Ábilseıit aǵanyń izin basqan saıypqyrandar.  Ońdasyn ELÝBAI, jýrnalıst