Ońtústikte «Azamattarǵa arnalǵan úkimet» qurylady

ShYMKENT. 14 sáýir. Memlekettik kirister departamentiniń basshysy Altynsary Úmbetálıev «Aımaqtyq» kommýnıkasııalar qyzmetinde memleketimizdiń Bes ınstıtýsıonaldyq reformasyn júzege asyrýǵa baǵyttalǵan «100 naqty qadam» Ult josparynyń oryndalýy týraly brıfıng berdi. Bul týraly egemen.kz tilshisi habarlady. Ult josparyndaǵy salyq pen keden saıasatyna qatysty 9 qadam boıynsha oıyn júlgelegen departament basshysy: «Bul qoıylyp otyrǵan mindetterdiń barlyǵy da mańyzdy tapsyrmalar. Sebebi, ındýstrııalandyrý jáne ekonomıkalyq ósim reformasynda salyq jáne keden saıasatyn tıimdi júrgizý el damýynda erekshe ról atqarady», dedi. Sonymen birge ol bıýdjetti tolyqtyrýdyń basty kózi salyqtan túsetin túsim ekenin,  qazirgi jaǵdaıda salyqtyq túsimderdi kóbeıtý máselesin salyq jáne keden saıasatyn ońtaılandyrý arqyly sheshýge bolatynyn atap ótti. «Jalpyǵa birdeı deklarasııalardyń ýaqytyly qabyldanýyn jáne óńdelýin tolyqqandy qamtamasyz etý maqsatynda «Azamattarǵa arnalǵan úkimet» memlekettik korporasııasy qurylýda. Bul korporasııa, memlekettik qyzmet kórsete otyryp, deklarasııalardy qabyldaý tıimdiligin arttyrady», dedi ol. Baqtııar Taıjan. Derek, foto: egemen.kz