ASTANA. 15 sáýir. Qazaqstan Prezıdenti Nursultan Nazarbaev О́zbekstan Respýblıkasynyń rezıdenti Islam Kárimovpen kezdesti. Bul týraly akoda.kz-ke silteme jasaǵan egemen.kz tilshisi habarlady.
Memleketter basshylary saýda-ekonomıka, sý-energetıka, kólik-logıstıka jáne mádenı-gýmanıtarlyq salalardaǵy ekijaqty yntymaqtastyqtyń negizgi baǵyttaryn qarastyrdy.
Sonymen qatar, Nursultan Nazarbaev pen Islam Kárimov kún tártibindegi ózekti halyqaralyq máselelerdi, sondaı-aq, óńirlik qaýipsizdikti qamtamasyz etýge, Tashkentte ótkizý josparlanyp otyrǵan ShYU Sammıtine qatysty jaıttardy talqylady.
Qazaqstan Prezıdenti eki eldiń arasyndaǵy tarıhı dostyq qatynastarǵa toqtalyp ótti.
«Biz bul baılanystardy Táýelsizdik jyldary saqtap qana qoımaı, memleketterimizdi jaqyndastyra tústik. Bul oraıda, kórshi retindegi bizdiń rııasyz nıetpen kezdesý tájirıbemizdiń mańyzy zor. Men Sizben dostyǵymdy, qazaq pen ózbek halqynyń dostyǵyn maqtan tutamyn. Maqsat – osy qarym-qatynastardy, ózara senimdi nyǵaıtyp, kelesi urpaqqa mıras etip qaldyrý. Barsha qazaqstandyqtar atynan ózbek halqyna tabys pen baq-bereke tileımin», – dedi Nursultan Nazarbaev.
Islam Kárimov eki memleket arasynda shynaıy dostyq qarym-qatynas, qurmet pen ózara tileýlestik bar ekenin aıtty.
«Biz ómir súrip jatqan qazirgideı kúrdeli kezeńde dál osy qasıetter qajet. Nursultan Nazarbaevtyń bul sapary qazirgi jaǵdaıda durys sheshimdi birlesip izdeý jolynda pikir almasý úshin de mańyzdy. Álemdik ekonomıkada daǵdarys jalǵasýda, dúnıe júziniń eshbir memleketi qıyndyqtan kende emes. Biz durys jolmen júrip, árdaıym baǵytymyzdy birlese baıyptap otyrýdy qalaımyz», – dedi О́zbekstan Prezıdenti.
Talǵat Raıymbek.
Derek, foto: akoda.kz.
