ASTANA. 24 sáýir. Búgin AQSh-tyń Kalıfornııa shtatynyń Inglvýd qalasynda otandasymyz Gennadıı Golovkın amerıkalyq Domınık Ýeıdti jeńip, kásipqoı bokstaǵy 35-shi jeńisine jetti. Bul týraly egemen.kz tilshisi habarlady.
Bul aıqasty jankúıerler asyǵa kútti. О́ıtkeni, Golovkın jekpe-jekke WBC (Interim), WBA, IBF, IBO belbeýlerin tikken bolatyn. Kezdesýde Golovkın qarsylasyn birinshi raýndta nokdaýnǵa jiberip, ekinshi raýndta sulatyp saldy. Sóıtip, jekpe-jek eki raýndqa ǵana sozylyp, otandasymyz kásipqoı bokstaǵy 35 aıqasynyń barlyǵyn jeńispen aıaqtady. Sonyń ishinde 32 kezdesýdiń 22-sinde ýaqytynan buryn jeńiske jetti. Al Ýeıd alǵash ret qarsylasynan jeńildi. Buǵan deıin ol 18 ret sharshy alańǵa shyǵyp, sonyń barlyǵyn jeńgen bolatyn. Jekpe-jekte qazaqstandyq boksshy qatarynan 16-shy ret WBA tujyrymyndaǵy chempıondyq beldikti qorǵap qaldy.Onyń ústine Golovkınniń IBO ataǵyn 13 ret, WBC (Interim) tujyrymyndaǵy chempıondyq ataqty tórt ret qorǵap qalsa, IBF ataǵyn bir ret ıelengen.
Qazaqstandyq boksshy Domınık Ýeıdpen aıqasy úshin 2 mıllıon AQSh dollaryn alady. Ýeıdke 500 000 dollar tabys etiledi. Endi Golovkın Saýl Alvares pen Amır Han arasynda ótetin jekpe-jektiń jeńimpazymen qolǵap túıistirýi tıis. Golovkın IBF/IBO/WBA tujyrymdary boıynsha álem chempıony ári WBC tujyrymy boıynsha álemniń ýaqytsha chempıony. Sondyqtan ol Alvarestiń WBC chempıondyq tıtýlyna úmitti. Sol úshin Golovkın Alvaresti sharshy alańǵa shaqyryp jatyr. Alaıda, Alvarestiń komandasy otandasymyzǵa áli naqty jaýabyn aıtqan joq.
Dastan Kenjalın.
Derek: egemen.kz
Foto: egemen.kz, facebook áleýmettik jelisi
