Otandyq kásiporyndarǵa sertıfıkat tapsyryldy

ATYRAÝ. 25 sáýir. Atyraýda Soltústik Kaspıı jobasynyń operatory «Nort Kaspıan Opereıtıng Kompanı N.V.» (NKOK) kompanııasy qazaqstandyq 17 kompanııaǵa standarttaý jónindegi halyqaralyq uıymnyń (SHU) ISO 9001, ISO 14001, OHSAS 18001, ISO 22000 sertıfıkattaryn berý saltanatty sharasyn uıymdastyrdy. Olardyń barlyǵy Sapany basqarý ortalyǵy («QMC» JShS) ótkizgen oqýdan oıdaǵydaı ótip, Rina Services SpA Kazakhstan kompanııasymen sertıfıkattaldy. Bul týraly egemen.kz tilshisi habarlady. Otandyq kásiporyndardyń oqý men sertıfıkattaý shyǵyndaryn NKOK kompanııasy qazaqstandyq qamtýdy damytý jónindegi uzaq merzimdi arnaıy baǵdarlama sheńberinde óz moınyna alǵan. Baǵdarlama mindetteriniń biri jergilikti kompanııalardyń halyqaralyq standarttarǵa sáıkes turaqty damýyna yqpal etýge, sonymen qatar qazaqstandyq mamandardyń biliktiligin arttyrýǵa baǵyttalǵan. Qazaqstandyq 17 kásiporyn basshylaryna ISO 9001, ISO 14001, OHSAS 18001, ISO 22000, ISO 50001 halyqaralyq standarttary boıynsha sertıfıkattardy tabys etken NKOK kompanııasynyń jergilikti qamtý jónindegi menedjeri Dáýirbek О́tejanovtyń aıtýynsha, NKOK-tyń qazaqstandyq qamtýdy damytý jónindegi baǵdarlamalardy júzege asyrý sheńberindegi memleket saıasatyna jan-jaqty qoldaý kórsetiledi, sonymen qatar, jergilikti jabdyqtaýshylardyń áleýetin ósirýge qoldaý kórsetý baǵytynda aýqymdy jumys júrgizile beriledi. «Kompanııada jergilikti qamtýdy damytý boıynsha júıeli tásildeme júzege asyrylýda jáne naqty mindetter belgilengen uzaq merzimdi strategııa qabyldanǵan. NKOK sheteldik merdigerlerden góri jergilikti kompanııalardy tartýǵa múddeli, bul rette olar Soltústik Kaspıı boıynsha ónim bólisý týraly kelisimde belgilengen krıterıılerge sáıkes bolýy kerek jáne olardyń taýarlary men qyzmetteri básekelesýge jaramdy bolýy tıis. ISO standarttary boıynsha halyqaralyq sertıfıkat jergilikti kompanııalarǵa kóptegen deńgeılerde eleýli yqpalyn tıgizedi. Onyń ústine, olar sertıfıkattar alǵannan keıin Soltústik Kaspıı jobasynyń tenderlerine anaǵurlym senimdi qatysýmen qatar, dúnıe júzi boıynsha basqa da halyqaralyq kompanııalarǵa óz taýarlary men qyzmetterin usynýdaǵy básekelestik deńgeıin arttyra alady», – dedi ol. Onyń málim etýinshe, ISO standarttarynyń engizilýi birinshiden, qazaqstandyq kompanııalardyń ónimdiligin ońtaılandyrýǵa jáne tıimdiligin arttyrýǵa, ekinshiden, olar úshin tenderlik qujattardyń tolyq jáne sapaly túrde usynylýyn qamtamasyz ete otyryp, kompanııalardyń kelisimshart berýdegi múmkindikterin keńeıtýge, jáne kelisimshart boıynsha jumystardyń, sonymen qatar ýaqtyly jetkizilimderdiń bıýdjet sheńberinde, barlyq tehnıkalyq krıterıılerge jáne sapa talaptaryna sáıkes oryndalýyna, bul rette tapsyrys berýshileriniń talaptaryn tolyq qanaǵattandyrýǵa teńdessiz qoldaý kórsetilýin qamtamasyz etýge múmkindik beredi. «Biz Soltústik Kaspıı Konsorsıýmyna halyqaralyq standarttar boıynsha sertıfıkattaýdan ótý barysynda kórsetken qoldaýy úshin rızamyz. Kórsetilgen qoldaýdyń nátıjesinde bizdiń kompanııamyz qyzmetimizdiń tıimdiligin arttyryp, kórsetiletin qyzmetterimizdiń deńgeıin kóterdi jáne spektrin keńeıtti», – dedi «Qazelektromash» dırektoryń orynbasary Aleksandra Raspopına. Joldasbek Shópeǵul. Derek: egemen.kz. Foto: Rahym Qoılybaev.