Qarqaralyda polısııa qyzmetkeri oq atýǵa májbúr boldy

QARAǴANDY. 25 sáýir. Qaraǵandy oblysyndaǵy Qarqaraly aýdanynda bolǵan kıkiljińde oq atylyp, bir adam qaza tapty. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady. Oqıǵa Qarqaraly qalasyndaǵy «Tamasha» restorany mańynda bolǵan. Polısııa qyzmetkerleriniń aıtýynsha, alkogoldi ishimdik ishken bir top adam jol-patrýldik polısııasynyń avtokóligin toqtatyp, tártip saqshylaryn balaǵattaǵan. Olar osydan biraz buryn polısııa qyzmetkeriniń mas kúıinde mashına júrgizgen bireýiniń kýáligin alyp qoıǵanyn eske salyp, kiná artqan. Bunymen de qoımaı, olar tártip saqshylaryna kúsh kórsetipti. Oqıǵa ýshyǵyp bara jatqan soń, polısııa qyzmetkerleri aspanǵa jáne jerge qarata eskertý oǵyn atqan. «Sol kezde jerge tıgen oq toıtarylyp baryp, 28 jastaǵy jigittiń ishine tıgen», degen joramal aıtylýda. Jaraqattyń saldarynan ol aýrýhanada qaıtys boldy. Al osy oqıǵaǵa qatysy bar kúdiktiler polısııa bólimshesine jetkizildi. Qazirgi ýaqytta prokýratýra organdary qarý qoldanǵan polısııa qyzmetkeriniń áreketi qanshalyqty zańǵa sáıkes keletinin tekserý ústinde. Sonymen qatar, Qaraǵandy ishki ister departamentiniń ózindik qaýipsizdik qyzmeti qyzmettik tekserý júrgizýde. Qaırat Ábildınov. Derek: Qaraǵandy oblystyq ishki ister departamentiniń baspasóz qyzmeti. Foto: halyknews.kz.