Shekaradaǵy aýdan qaterli aýrýdyń ordasyna aınaldy

QOSTANAI. 26 sáýir. Adamnyń ımmýndyq tapshylyǵy vırýsy (AITV) taralýy jóninen Qostanaı oblysynyń Reseımen shekarasynda jatqan Qarabalyq aýdany «kósh bastap» tur. Oblystyq juqpaly ımmýndyq tapshylyq sındromy (JITS) ortalyǵynyń mamandary men Qarabalyq aýdandyq ákimdigi janyndaǵy turǵyndar densaýlyǵyn qorǵaý jónindegi úılestrý keńesiniń otyrysynda aýdandaǵy epıdemıologııalyq jaǵdaı kúrdeli ekenin aıtyldy. Bul týraly aina.kz saıtyna silteme jasaǵan egemen.kz tilshisi habarlady. Qarabalyq aýdany oblys boıynsha AITV-niń kóptigi jóninen birinshi oryn alsa, al Qostanaı oblysy respýblıka boıynsha besinshi orynda tur. Bul da kóńil jubatarlyq kórsetkish emes. Mamandar qaterli aýrýdyń aıadaı ǵana Qarabalyqta jyldam taraýyn onyń shekarada ornalasýymen baılanystyrady. Sońǵy úsh aıdyń ózinde  «Qaıraq» shekaralyq baqylaý beketinde zańsyz esirtki aınalymyndaǵy 4 oqıǵa tirkeldi, onyń bireýi esirtkini zańsyz daıyndaǵan jáne óńdegen. Aýdandyq ishki ister bóliminde 13 nashaqor tirkeýde turady. Ortalyq aýrýhananyń bas dárigeri Bekterhan Shympeıisovtyń aıtýynsha, bul muztaýdyń betki jaǵy ǵana, esirtki paıdalanatyndar aýdanda munan áldeqaıda kóp ekeni aıan. Aýrýhanaǵa aı saıyn esirtki paıdalanyp, esinen tanǵan 10-15 adam túsedi eken. Qaterli vırýsty taratatyndar solar ekenin aıtty mamandar. Aýdanda 2000-shy jyldyń basynan beri adamnyń ımmýndyq tapshylyǵy vırýsyn juqtyrǵan 41 adam tirkelgen. Juqpaly ımmýndyq tapshylyq sındromymen aýyratyndar joq dep esepteledi, vırýsty juqtyrǵan 10 adam ólgen. Olardyń basym kópshiligi jumyssyzdar, negizinen 30 ben 40 jas aralyǵyndaǵy adamdar. AITV-ny juqtyratyndar negizinen er adamdar. 16 jyl ishinde vırýsty juqtyrǵan segiz ekiqabat áıel tirkelgen. Aýdanda qaterli vırýspen aýyratyndardy tirkeýde, anyqtaýda qıyndyqtar bar. Juqtyratyndar berekesiz otbasynyń músheleri, qujattary bola bermeıdi, emhanaǵa tirkelmeıdi. Onyń syrtynda aýdanda ózge memleketten kelgen myńnan asa adam kelisimmen turyp jatyr. Olar tek qatty, oqys aýyrǵanda ǵana aýrýhanadan kómek suraıdy. Osynyń barlyǵy da AITV dıagnostıkasyn qıyndatyp otyr. Názıra Járimbetova. Derek, sýret: aina.kz.