QARAǴANDY. 24 sáýir. Qaraǵandylyqtar Golovkınniń amerıkalyq Domınık Ýeıdpen bolǵan jekpe-jegin kenshilerdiń mádenıet saraıy aldyndaǵy alańda ornatylǵan teleekrannan tamashalady. Bul týraly egemen.kz tilshisi habarlady.
Bul sharaǵa oblystyq dene shynyqtyrý jáne sport basqarmasy muryndyq bolǵan edi. Tańerteńgi mezgilge jáne de kún raıynyń qolaısyzdyǵyna qaramastan, jerles boksshyǵa jankúıerlik etken qala turǵyndary alańǵa molynan jıyldy. Olar áıgili boksshynyń kezekti jeńisine balasha qýanyp, áıdik qurmet kórsetti.
«Birinshi raýnd birin-biri baǵyp, barlaýmen ótti. Biraq raýndtyń aıaǵyna taman ózine senimdilik paıda bolǵan Gena qatty soqqy jasady. Nokdaýn boldy. Ekinshi raýnd kimniń kim ekenin kórsetti. Gennadıı kúmánsiz jeńdi. Maıqudyqtan shyqqan boksshy óziniń osy jeńisimen Qaraǵandy boks mektebiniń myqtylyǵyn taǵy bir márte dáleldedi», – dep óz oıymen bólisti Golovkınniń alǵashqy jattyqtyrýshysy Vıktor Dmıtrıev. Sondaı-aq, ol óziniń shákirti men barsha qazaqstandyq jankúıerlerdi tamasha tabyspen – ortaq jeńispen quttyqtady.
Qaırat Ábildınov.
Derek: egemen.kz.
Foto: V. Elızarova.
