Sletke qatysýshylar elimizdiń tuńǵysh Prezıdenti Nursultan Nazarbaevtyń ókilettigin 2020 jylǵa deıin uzartý maqsatynda jalpyhalyqtyq referendým ótkizý ıdeıasyna qoldaý bildirdi. Jastar jıynynda stýdenttik qurylys otrıadtary men «Jasyl el» jasaqtarynyń bes jyldyq jumystary qorytyndylanyp, bıylǵy medejeler belgilendi. «Atameken» qoǵamdyq birlestiginiń tóraǵasy Janbolat Turtaevtyń málimdeýinshe, oblysta qurylys otrıadtary qurylǵan alǵashqy jyly olardyń quramynda 600 jas bolsa, bes jylda jasaq músheleriniń sany 10 esege deıin artqan.
Satybaldy SÁÝIRBAI, Aqtóbe oblysy.
Birlesken jobalar jasaýǵa kelisti. Oblystyń áleýmettik-ekonomıkalyq baǵdarlamalaryn júzege asyrý úshin strategııalyq seriktestikter kerek. О́tken aptada oblys ákiminiń orynbasary E.Aıtahanov pen “Jınaq banki” AQ enshiles bankiniń basqarma tóraǵasy O.Smırnov ózara yntymaqtastyq memorandýmyna qol qoıdy. Eki tarap agroónerkásip sektory, qaıta óńdeý, shaǵyn jáne orta bıznes, mańyzdy ónerkásipterdi nesıelendirý, aqparattyq tehnologııalar men ınnovasııalyq tehnologııalardy birlese damytý jóninde jobalar jasaýǵa ýaǵda baılasty. Shymkent qalasynan fılıalyn ashyp otyrǵan bank túrli salalardy damytýǵa úlken qoldaý kórsetedi dep kútilýde.
Baqtııar TAIJAN, Ońtústik Qazaqstan oblysy.
«Azıada elshileri» kelip ketti. Qazaqstan «KS marketing» agenttigi Qysqy Azıada dıreksııasymen birlese otyryp, «Azıada elshileri» degen sharany qolǵa alǵan bolatyn. Quramynda belgili estrada, kıno men sport juldyzdary bar top jýyrda alǵashqy saparyn Semeıden bastady. Olarmen kezdesýge halyq kóp jınaldy. Kezdesýde el ómirindegi mańyzdy sport oqıǵasy týraly baıypty áńgime qozǵalyp, onyń sońy tamasha oıyn-saýyqqa ulasty. «Azıada elshileri» elimizdiń basty qalalarymen birge, shalǵaıdaǵy eldi mekenderde de bolmaq. Al qorytyndy kezdesý Astanada ótkiziletin bolady.
Dáýlet SEISENULY, Semeı.
Sýdıalar jumysy saralandy. Atyraý oblysynyń sottarynda byltyr esirtki, adam óltirý, zorlaý, bopsalaý baǵytyndaǵy qylmystyq ister azaıypty. Alaıda, urlaý, tonaý jáne tabıǵatqa zııan keltirýge baılanysty ister kóbeıipti. Bir jylda jergilikti sottarda 1261 adam sottalǵan. Bul týraly Atyraý oblystyq sotynda ótken jyldyń qorytyndysyna arnalǵan keńeıtilgen májiliste jan-jaqty aıtyldy. Joǵarǵy Sottyń sýdıasy M. Qamnazarov Atyraý sottarynda ádilsot tóreligin iske asyrýdyń mańyzyna toqtaldy. Oblystyq sot tóraǵasy J.Alanov jańadan ant qabyldaǵan sýdıalar Z.Typylova men B.Meńseıitovanyń jumysyna sáttilik tiledi.
Joldasbek ShО́PEǴUL, Atyraý oblysy.
Soǵystyń taǵy bir shejiresi. Oblysta «Qostanaı oblysy Uly Otan soǵysynda: maıdan men tyldyń birligi» degen kitap jaryq kórdi. Oǵan soǵys ardagerleriniń ótken merekeli jyly jasaǵan bastamasy túrtki boldy. Qostanaılyqtardyń Uly Otan soǵysyndaǵy erlik isteri áńgime bolatyn bul kitaptyń tusaýkeserine maıdangerlermen qatar jalpy jurtshylyq ókilderi de jınaldy. Muraǵattar men murajaılarda saqtalǵan qujattar, bozdaqtardyń hattary, ardagerlerdiń estelikteri qaharly kúnderdi oqyrmannyń kóz aldyna alyp keledi. Soǵys týraly oblysta jaryq kórgen burynǵy kitaptardan bul basylymnyń negizgi ereksheligi de osynda bolsa kerek. Kitap 2100 taralymmen shyqty.
Názıra JÁRIMBETOVA, Qostanaı.
«Bir tereze» qyzmeti aýylǵa jetti. О́tken aptada Jambyl aýdanyndaǵy Grodıkovo aýyldyq okrýginen oblystyq halyqqa qyzmet kórsetý ortalyǵynyń jańa fılıaly ashyldy. «Bir tereze» júıesi arqyly qyzmet kórsetetin fılıalda turǵyndar ótingen qujattar jedel daıyndalyp, al aqyl-keńes kerekterine ol da muqııat túsindirilýde. Jańa zaman suranysymen salynǵan fılıalda úlgili qyzmet úshin qajetti jaǵdaılardyń bári jasalǵan. Sondaı-aq, fılıal qyzmetkerleri qyzmet kórsetýdi jetildirý maqsatynda HQKO-nyń aýdandyq bólimimen, muraǵatpen jáne prokýratýra sııaqty quqyq qorǵaý organdarymen júıeli baılanysta jumys isteıdi. Buǵan deıin oblys boıynsha mundaı 14 jańa ortalyq ashylǵan bolatyn.
Kósemáli SÁTTIBAIULY, Jambyl oblysy.
Aqyn-jazýshylar bas qosty. О́tken aptada oblys ortalyǵynda bolǵan bul basqosýdy oblystyq mádenıet basqarmasy, qala ákimdigi, Buqar jyraý atyndaǵy ádebıet jáne óner mýzeıi uıymdastyrdy. Barlyǵy birlesip jergilikti aqyn-jazýshylardyń basyn qosyp jatqandaryna qaraǵanda, mádenıetke, ádebıetke, ónerge de jaqynyraq bolyp, jyly kózqaras tanytaıyq degen jaqsy oı kelgen sııaqty. Al, jalpy osy sharanyń ótýine bastamashy bolǵan «Nur Otannyń» jergilikti bólimshesi egemendik, eldik jaıly shyǵarmalar jazǵan aqyn-jazýshylardy syılyqtarmen, alǵys hattarmen marapattady. Aldaǵy ýaqytta ádebıetshilerdiń jas býynyn tárbıeleý úshin shyǵarmashylyq kezdesýler, baıqaýlar ótkizip turý sheshildi.
Farıda BYQAI, Pavlodar.
