Alǵys arqalaǵandar

Shyǵys pen Batystyń damyǵan elderiniń kóbinde keńinen taraǵan tabysty bıznes fılosofııasy degen túsinik bar. Onyń mánisi mynada eken: árbir kásipker óziniń tabysynyń belgili bir mólsherin qaıyrymdylyqqa qııýy kerek. Sonda onyń tasy órge domalap, sharýasy shalqıtyn kórinedi. Al bizdiń keıipkerimiz kásipker Álııa Sadyrbaeva áriptesi Murat Ábenovpen birigip «Raqmet. Spasıbo» qaıyrymdylyq beketin ashqanda, osy isten bir paıda kóreıikshi dep áste oılamaǵan edi. Kenshiler astanasynda bular júzege asyrǵan bul joba biraz ýaqyttan beri jemisti jumys istep tur. Bul jerde muqtaj jandar tegin nan alady, qaıyrymdy jandar ákelip tapsyrǵan  kıim-keshek, basqa da usaq-túıek zattarǵa ıe bolyp jatady. «Áýeli áleýmettik jelide habarlama jarııa­ladym. Sóıtip, kún saıyn 20 bólke nandy tegin taratyp turdym. Meniń bul isimde eshqandaı bóten oı joq. Tek qana muqtaj jandarǵa kómek qolyn sozsam deımin. Osy iske dep jumsaǵan eki jarym myń teńgeden men kedeı bolyp qalmaımyn. Múmkin bul nan keıbir jannyń dastarqanyndaǵy jalǵyz ǵana dám bolýy ábden múmkin ǵoı», – deıdi Murat. Qaıyrymdylyq beketine keletin jandardyń basym bóligi zeınetaqysy jetińkiremeıtin egde adamdar men kóp balaly analar. Zeınetkerler negizinen nan alady, al jalǵyzbasty analar balalaryna dep kıim-keshek qarastyrady. Munda jıi bas suǵatyn jannyń biri – Láılá Ismaılova. Jeti birdeı balasy bar jalǵyzbasty ananyń jaǵdaıy shynymen de qıyn. Oıda joq jerden otaǵasynan aıyrylyp, jesirliktiń qamytyn kıgen áıeldi aýyr turmys ábden qajytqan. «Raqmet. Spasıbo» jobasy týraly estigende ol óz qulaǵyna ózi senbepti. Sonda da baryp, kózben kórmekshi bolǵan. Keldi. Kórdi. «Raqmet. Spasıbo» qaıyrymdylyq beketinde balalarǵa arnalǵan nesheme túrli kıim-keshek, zattar men buıymdar bar eken. «Úlken balalarym mektepte oqıdy. Eń kishim – bir jasta. О́zim eden jýýshy bolyp isteımin. Jasyratyny joq, eńbekaqym birde jetse, birde jetpeı jatady. О́tken joly qolyma jap-jańa balalar arbashasy tıdi. 15 myń teńgeden joǵary turatyn mundaı arbashany men ǵumyry satyp ala almas edim. Bul beket men sııaqtylardyń qutqarýshysy», – dep syr aqtardy Láılá. «Raqmet. Spasıbo» qaıyrymdylyq beketine kúnine jıyrmashaqty adam keledi. Bos ketpeıdi. Áıteýir, qoldaryna bir zatty ustap qaıtady. Álbette, olar Álııa men Murat syndy jany jomart, qoly ashyq qaıyrymdy jandarǵa alǵystaryn jaýdyryp ketedi.  Qaırat ÁBILDINOV, «Egemen Qazaqstan» QARAǴANDY